په بازارموندنه کې د خوږې ژبې او ښه سلوک ارزښت

څرنګه چې ګرانو لوستونکو ته څرګنده ده، په سوداګرۍ او بازارموندنه کې حوصله، ښه رویه او انساني اخلاقي سلوک بنسټیز ارزښت لري. بازار یوازې د توکو د پېر او پلور ځای نه دی، بلکې د انساني تعامل، باور جوړونې او دوامدارو اړیکو ډګر هم دی.
له بده مرغه، په ځینو بازارونو کې داسې هټیوال لیدل کېږي چې کله مشتریان د توکو د بیې په اړه چنه‌وهل یا خبرې اترې وکړي، نو هټیوال له حوصلې ووځي او له مشتریانو سره سخت، توهین‌آمیز او تحقیرکوونکی چلند کوي. دا ډول سلوک نه یوازې مشتری له پېر څخه پښیمانه کوي، بلکې کله ناکله تر لفظي شخړو او حتی فزیکي ناندریو پورې رسېږي. په دې توګه هټیوال د سوداګرۍ ټول اخلاقي او مسلکي اصول تر پښو لاندې کوي.
د دې ستونزې اساسي لامل دا دی چې یاد هټیوال د بازارموندنې، سوداګرۍ او د مشتریانو سره د چلند اصول نه دي زده کړي. ځینې یې هڅه کوي چې مشتریان وغولوي او غیرمعیاري یا ټیټ‌کیفیت توکي ورباندې وپلوري، چې دا چاره په اوږدمهال کې د دوی د کاروبار لپاره زیانمنه تمامېږي.
برعکس، هغه هټیوال چې تعلیم‌یافته دي او د سوداګرۍ اصول یې زده کړي، له حوصلې، درناوي او ښه اخلاقو سره له مشتریانو سره چلند کوي. په ځانګړي ډول د هرات، مزار شریف او ننګرهار د بازارونو ډېری هټیوال د نرم مزاج، خوږې ژبې او مناسب سلوک له امله د مشتریانو باور ترلاسه کړی او بریالي کاروبارونه لري.
له همدې امله، په دې لیکنه کې هڅه کوو چې په بازارموندنه (مارکېټینګ) کې د خوږې ژبې او ښه سلوک رول او ارزښت په مسلکي ډول وڅېړو.
په بازارموندنه کې د خوږې ژبې رول او ارزښت
په بازارموندنه کې د خوږې ژبې کارول یوازې ادبي ښکلا نه ده، بلکې یوه اغېزمنه ستراتیژي ده چې د پېرېدونکي پر ذهن، احساس او پرېکړه مستقیم اغېز لري.
۱. د پېرېدونکي سره د احساساتي اړیکې جوړول
خوږه، درناوي‌ناکه او مثبته ژبه د پېرېدونکي له زړه سره اړیکه ټینګوي. کله چې مشتری احساس کړي چې ورسره په نرمه لهجه او درناوي خبرې کېږي، باور یې ډېرېږي او د پېر احتمال لوړېږي.
بېلګه:
«دا توکی واخلئ»
«دا توکی کولی شي ستاسې ستونزه په اسانه حل کړي»
۲. د باور او اعتبار لوړول
سړه، امرکوونکې او تنده ژبه خلک لرې کوي، خو خوږه ژبه شرکت یا هټۍ ته د باور وړ څېره وربخښي. باور د بازارموندنې بنسټ دی.
۳. د محصول ارزښت لوړ ښودل
خوږه ژبه عادي توکي هم ځانګړي معرفي کوي. د کلمو هوښیار انتخاب د محصول ارزښت د مشتری په ذهن کې لوړوي.
بېلګه:
«ارزان موبایل»
«اقتصادي موبایل، د لوړې وړتیا او دوامدار کیفیت سره»
۴. د پېرېدونکي پرېکړه اسانه کول
کله چې پیغام په ساده، نرمه او هڅوونکې ژبه وړاندې شي، مشتری ځان مجبور نه، بلکې قانع احساسوي.
۵. د وفادارو مشتریانو رامنځته کول
خوږه ژبه یوازې پلور نه زیاتوي، بلکې دوامدارې اړیکې هم جوړوي. هغه مشتری چې ښه تجربه ولري، بیا بیا راګرځي او نور کسان هم ورپېژني.
۶. په سیالۍ کې برلاسی کېدل
په هغه بازار کې چې ډېری توکي یو له بل سره ورته وي، همدا ژبه او سلوک توپیر رامنځته کوي. مسلکي او خوږه لهجه ستاسې پیغام له نورو جلا کوي.
پایله
په بازارموندنه کې خوږه ژبه او ښه سلوک:
احساسات راپاروي
باور جوړوي
پلور زیاتوي
برانډ انساني کوي
خلک یوازې توکي نه اخلي؛
هغوی احساس، باور او درناوی اخلي.

د ارزښتمن کارمند د استعفا په صورت کې د ادارې چلند

زموږ انګلیسي ویبپاڼه: