ولې باور له استعداد څخه ډېر مهم دی؟

ولې باور له استعداد څخه ډېر مهم دی؟
د بریالي ټیم او سازمان د جوړولو راز

سریزه
په هر کاري چاپېریال کې باور د سالمو اړیکو، اغېزمنې همکارۍ او دوامدارې بریا بنسټ ګڼل کېږي. که د مدیرانو او کارکوونکو ترمنځ متقابل باور موجود وي، د کار کیفیت لوړېږي، د ټیم همکاري پیاوړې کېږي او سازمان خپلو موخو ته په چټکۍ رسېږي. برعکس، د باور نشتوالی د بې‌باورۍ، کمزورې اړیکو، شخړو او د کارکوونکو د انګېزې د کمېدو لامل ګرځي.
ډېری کسان فکر کوي چې د یوه ټیم یا سازمان بریا یوازې د کارکوونکو په استعداد، پوهه او تجربه پورې تړلې ده، خو څېړنې او عملي تجربې ښيي چې باور د استعداد په پرتله ډېر مهم رول لري. تر ټولو بریالي ټیمونه تل هغه نه وي چې تر نورو ډېر هوښیار یا تجربه‌لرونکي وي، بلکې هغه دي چې غړي یې پر یو بل باور ولري، خپلې نظریې په ازاد ډول شریکې کړي، له تېروتنو زده‌کړه وکړي او د اړتیا پر مهال له یو بل څخه مرسته وغواړي.
باور؛ د بریالي ټیم بنسټ
باور د اغېزمن ټیمي کار بنسټ دی، او ټیمي همکاري لا هم د هر سازمان لپاره تر ټولو ستره سیاليزه برتري ګڼل کېږي. خو ډېری مشران د باور په مفهوم سم نه پوهېږي. باور په خپله نه رامنځته کېږي؛ بلکې په قصدي او دوامداره هڅو جوړېږي. دا بهیر له داسې ځانګړنې پیلېږي چې ډېری مشران ترې ډډه کوي: د خپلو نیمګړتیاوو او تېروتنو منل.
د سازماني باور څېړونکي راجر مایر، جېمز ډېویس او ډېوېډ شورمن باور داسې تعریفوي:
“باور هغه چمتووالی دی چې یو کس د بل چا د کړنو پر وړاندې د ځان د زیان‌ منېدو خطر ومني.”
له دې تعریف څخه څرګندېږي چې زیان‌ منل د باور پایله نه، بلکې د باور د رامنځته کېدو اساسي شرط دی.
له بده مرغه، ډېری مشران خپل تمرکز یوازې پر مهارتونو، کړنلارو او د فعالیت پر شاخصونو کوي، خو هغه مهم عنصر له پامه غورځوي چې دا ټول سره نښلوي، او هغه عنصر باور دی.
په کاري چاپېریال کې د باور مهم رول
۱- د ټیمي همکارۍ پیاوړتیا:باور کارکوونکي هڅوي چې خپلې نظریې، تجربې او معلومات په ډاډه زړه شریک کړي او د ګډو موخو لپاره په رښتینې همکارۍ کار وکړي.
۲- د اړیکو ښه والی:په باور ولاړ چاپېریال کې خبرې اترې روڼې، صادقانه او اغېزمنې وي، چې د غلط فهمۍ او شخړو مخه نیسي.
۳- د نوښت او خلاقیت وده:کله چې کارکوونکي د خپلو نظریو د څرګندولو له امله د ملامتېدو وېره ونه لري، نو نوښتګر فکرونه او ارزښتناک وړاندیزونه وړاندې کوي.
۴- د مسؤلیت احساس زیاتېدل:باوري کارکوونکي خپلې دندې په صداقت، ژمنتیا او مسؤلیت ترسره کوي او د خپلو کړنو حساب ورکولو ته چمتو وي.
۵- د انګېزې او دندې د رضایت لوړول:باور د کارکوونکو مورال او ژمنتیا پیاوړې کوي، د دندې رضایت زیاتوي او د کار پرېښودو کچه راکموي.
۶- د ستونزو اغېزمن حل:په باوري چاپېریال کې ستونزې نه پټېږي، بلکې په وخت راپور کېږي او د حل لپاره یې ګډ کار ترسره کېږي.
باور څنګه رامنځته کېږي؟
باور هغه وخت پیاوړی کېږي چې مشران:
خپلې تېروتنې ومني او ترې زده‌کړه وکړي.
د نورو خبرو ته په غور غوږ ونیسي.
د ملامتولو پر ځای د ستونزو اصلي لامل ولټوي.
پر خپلو ژمنو عمل وکړي.
د رښتینولۍ، شفافیت او عدالت عملي بېلګه وګرځي.
کله چې کارکوونکي ډاډه شي چې د یوې تېروتنې له امله به ونه رټل شي، ستونزې په وخت راپوروي، نوې نظریې وړاندې کوي او خپلې دندې په ډېر مسؤلیت ترسره کوي. همدا فضا د دوامدارې زده‌کړې، نوښت او پرمختګ زمینه برابروي.
په پايله کې ويلې شو چې باور د هر بریالي سازمان پټه پانګه ده. استعداد، تجربه او پرمختللې ټکنالوژي هغه وخت خپله بشپړه ګټه ښيي چې د باور فضا موجوده وي. هغه سازمانونه چې باور ته ارزښت ورکوي، نه یوازې پیاوړي او همغږي ټیمونه جوړوي، بلکې نوښت، لوړه تولیدي وړتیا او دوامداره بریا هم ترلاسه کوي.
په حقیقت کې استعداد د بریا لپاره مهم دی، خو یوازې استعداد بسنه نه کوي. که په یوه اداره کې د باور فضا موجوده وي، عادي کارکوونکي هم کولای شي سترې لاسته راوړنې ولري. برعکس، که باور نه وي، حتی ډېر بااستعداده کسان هم نه شي کولای یو پیاوړی او بریالی ټیم جوړ کړي.
لنډه دا چې: استعداد د بریا وړتیا ښيي، خو باور هغه ځواک دی چې د افرادو یوه ډله په یو همغږي، پیاوړي او بریالي ټیم بدلوي.
سرچینه:د ډاکټر جینا انډرسن مقاله Inc. Magazine
د ۲۰۲۶ کال د جولای ۱۷مه.

فکري افلاس څه ته وایي؟

زموږ انګلیسي ویبپاڼه: