د سواد نړیواله ورځ؛ زده کړه د هر انسان حق دی

نن، د سپټمبر ۸مه، د سواد نړیواله ورځ ده. UNESCO وايي چې سواد یوازې د لوستلو او لیکلو وړتیا نه ده؛ بلکې د انسان د نورو حقونو، ازادۍ، پوهې او د ښه راتلونکي لپاره بنسټ دی.

په افغانستان کې د سواد وضعیت لا هم د اندېښنې وړ دی. د UNESCO د ۲۰۲۵ راپور له مخې، د ۱۵ کلونو او پورته عمر خلکو یوازې شاوخوا ۳۷ سلنه باسواده دي؛ یعنې نږدې ۶۳ سلنه په دې عمر ډله کې له بنسټیز سواد څخه بېبرخې دي. د ښځو د سواد کچه لا هم ډېره ټیټه ده.

دا یوازې د ښوونځي ستونزه نه ده؛ دا د ټولې ټولنې ستونزه ده.

موږ څه کولای شو؟

– هره کورنۍ کولای شي خپل ماشومان، په ځانګړي ډول نجونې، زده کړو ته وهڅوي.

– هر باسواده کس کولای شي لږ تر لږه یو بل انسان په لوستلو او لیکلو پوه کړي.

– موږ کولای شو په خپلو سیمو کې د سواد د زده کړې له کورسونو ملاتړ وکړو.

– موږ کولای شو په کلیو او لرې پرتو سیمو کې د وړو کتابتونونو او مطالعې حلقو د جوړولو هڅه وکړو.

– موږ کولای شو هغه ماشومان او لویان چې له ښوونځي پاتې دي، د زده کړې فرصتونو ته ور وپېژنو.

– ښوونکي، لیکوالان او مدني ټولنې کولای شي د کتابونو او تعلیمي موادو په برابرولو کې مرسته وکړي.

– افغانان په بهر کې هم کولای شي د کتابونو، تعلیمي پروګرامونو او آنلاین زده کړو له لارې له خپلو خلکو ملاتړ وکړي.

– که هر یو یوازې د یوه انسان لاس د کتاب پر لور ور وغځوو، د یوې کورنۍ راتلونکی بدلېږي.

– او که زرګونه کسان دا کار وکړي، ټوله ټولنه بدلېدای شي.

راځئ د بیسوادۍ پر ځای د پوهې، کتاب او زده کړې کلتور پیاوړی کړو.

سواد د هر افغان حق دی؛ زده کړه د افغانستان راتلونکی دی.