سراج الدین حقاني ویلي چې د پاکستان پر وړاندې د انتقام او غچ اخیستلو جذبه نه لري

طالبانو د کورنیو چارو وزیر وزیر سراج الدین حقاني د پاکستان وروستیو هوایي بریدونو ته په غبرګون کې ویلي چې د غچ اخیستنې جذبه نه لري، خو له پاکستانیانو یې غوښتي چې د “ړندو بمباریو” مخه ونیسي. نوموړي دا څرګندونې د چهارشنبې په ورځ په کابل د یوه روغتون د قربانیانو خاورو سپارلو غونډه کې وکړې .

حقاني وویل چې طالبان د جګړې توان لري او په دې برخه کې “کمزوري” نه دي، خو نه غواړي چې د دوو مسلمانو هېوادونو ترمنځ وضعیت بحراني شي. هغه په ټینګار سره وویل: “موږ د پاکستان پر وړاندې د انتقام او غچ اخیستلو جذبه نه لرو” او زیاته یې کړه چې اوس هم د پاکستان پر وړاندې ښه نیت لري.

د کورنیو چارو وزیر د پاکستان د بریدونو په غبرګون کې د “بشپړ احتیاط” څخه کار اخیستو خبره وکړه او ویې ویل چې اجازه باید ورنه کړل شي چې د دوو مسلمانو هېوادونو ترمنځ ورورولي ګډ وډه شي. هغه پر پاکستانیانو او مذهبي عالمانو غږ وکړ چې د دغسې “ړندو بمباریو” مخنیوی وکړي چې په افغانستان کې ملکیان په نښه کوي.

حقاني د کابل پر روغتون هوایي برید “د شرم وړ” وګاڼه او پر بشري حقونو بنسټونو یې غږ وکړ چې د ورته پېښو بې پرې او رڼه څېړنه وکړي .

دا څرګندونې په داسې حال کې کیږي چې پاکستان پرون شپه د کابل په یوه روغتون هوایي برید وکړ. د افغانستان د کورنیو چارو وزارت ویاند عبدالمتین قاني ویلي چې په دغه برید کې ۴۰۸ کسان وژل شوي او ۲۶۵ نور ټپیان دي. خو پاکستان بیا دا تورونه رد کړي او ویلي یې دي چې د دوی بریدونه په ننګرهار او کابل کې د “ملېشو پر پوځي تاسیساتو” شوي دي .

د ملګرو ملتونو د بشري حقونو عالي کمېشنرۍ د دې برید د شفافې څېړنې غوښتنه کړې او په سیمه کې یې د اوربند غږ کړی دی .

ډیری افغانان د حقاني دې خبرو هک پک حیران کړی دي چې د خپلو خلکو وژلو ته خو مو جذبه لرله او د پنجاب د تیري او د دې وروستي جنګي جنایت پر وړاندې د انتقام جذبه نه لرئ، داسې نه چې د کاسې لاندې نیم کاسه وي.

زموږ انګلیسي ویبپاڼه: