افغان کډوال ایران او پاکستان

د افغان ګډوالو پر وړاندې د پاکستان او ایران له‌خوا روان چلند نه یوازې غیر انساني، بلکې د نړیوالو قوانینو، بشري ارزښتونو او کنوانسیونونو ښکاره نقض دی. دا هیوادونه، چې ځانونه د اسلام، انسانیت او ګاونډیتوب پلویان بولي، په عملي توګه له هغو خلکو سره سخت، توهینوونکی او ظالمانه چلند کوي چې د جګړې، فقر، ظلم او سیاسي بې‌ثباتۍ له امله یې خپل وطن پرېښی دی د مهاجرت نړیوال کنوانسیونونه، لکه د 1951 د کډوالو کنوانسیون او د بشري حقونو نړیوال میثاق، ټولو هیوادونو ته د ګډوالو د خوندي کولو، د هغوی د عزت ساتلو، او د اجباري شړلو پر ضد د درناوي مسؤولیت ورسپارلی. خو متأسفانه، په وروستیو میاشتو او کلونو کې لیدل شوي چې افغان مهاجر له دواړو ګاونډیو هیوادونو څخه، د هیڅ قانوني بنسټ پرته، یا شکنجه شوي، زنداني شوي، شړل شوي، یا حتی وژل شوي دي. ماشومان، ښځې، زاړه او ناروغان له هېڅ استثنا پرته، له خپلو کورونو، کارونو او حتی د کلونو استوګنې له ځایونو ایستل کېږي. دغه کار نه یوازې غیرقانوني دی، بلکې د افغان ولس پر رواني، ټولنیز او اقتصادي حالت خورا ناوړه اغېز لري موږ له نړیوالې ټولنې، د ملګرو ملتونو ادارو، د بشري حقونو څارونکو بنسټونو او د کډوالو لپاره ځانګړو سازمانونو څخه جدي غوښتنه کوو چې دا موضوع جدي تعقیب کړي، د پاکستان او ایران له حکومتونو څخه حساب وغواړي، او د افغان مهاجرو د حقونو د خوندي کولو لپاره بیړني اقدامات وکړي.

افغانان د عزت وړ ولس دی. مهاجرینو ته نه صدقه غواړو، نه رحم؛ بلکې حق غواړو  هغه حق چې د نړیوال قانون، اسلامي ارزښتونو، او انساني وجدانو له مخې باید ورکړل شي.

 

زموږ انګلیسي ویبپاڼه: