افغان کډوال د بې کارۍ له کړکیچ سره مخ دي

د کډوالۍ نړیوال سازمان (IOM) وايي، افغانستان د میلیونونو راستنېدونکو د جذب توان نه لري، ځکه له ایران او پاکستانه د افغان کډوالو ایستلو بهیر پرله پسې روان دی.

د ملګرو ملتونو دغه سازمان په افغانستان کې په ځانګړې توګه تازه ستنو شویو ته اقتصادي او کاري فرصتونه ډېر محدود بللي دي.

د IOM د معلوماتو له مخې، یوازې د روان ۲۰۲۵ کال په لومړیو څلورو میاشتو کې له ۳۵۰ زرو زیات کسان بې ځایه شوي دي.

راپور کې راغلي، چې په ټوله کې د ۲۰۲۳ له سپټمبر راهیسې څلور میلیونه افغانان بېرته ستانه شوي، چې د هغوی ډېری یې له سرپناه، عاید او د ژوند لومړنیو اړتیاوو بې برخې دي.

د کارپوهانو په باور، د افغانستان اقتصاد د بې کارۍ د حل وړتیا نه لري.

د نړیوال بانک د ۲۰۲۵ د راپور له مخې، تر ۲۰۳۰ پورې به لږ تر لږه ۱.۷ میلیونه ځوانان د کار بازار ته داخل شي، خو که فرصتونه ایجاد نه شي، نو ګڼ افغانان به یو ځل بیا کډوالۍ ته اړ شي.

په ورته وخت کې، د کډوالو نړیوال سازمان د مهارتونو د روزنې او د وړو کاروبارونو د ملاتړ پروګرامونه پیل کړي دي.

د راپور له مخې، تر اوسه نږدې ۳ زره کسان روزل شوي او له ۲۶۰۰ سوداګریو ملاتړ شوی چې ۲۲ سلنه یې د ښځو په نوم دي. د دغو پروژو له لارې شاوخوا ۱۲ زره دندې رامنځته شوې دي.

سره له دې، مرسته کوونکي بنسټونه وايي چې اوسني اقدامات د اړتیاوو یوازې یوه برخه پوره کوي او که پراخه نړیواله همکاري ونه شي، د بې کارۍ او بې ځایه کېدو کړکېچ به لا پسې ژور شي.

دا په داسې حال کې ده، چې لا هم له ایران او پاکستانه د افغان کډوالو د جبري اخراج لړۍ چټکه ده او له پرله پسې غوښتنونو هم دواړو هېوادونو د افغان کډوالو د ایستنې بهیر نه دی ورو کړی.

ABN