د کورنۍ ارزښت او د ماشومانو روغه روزنه

کورنۍ د انسانانو د ټولنیز جوړښت تر ټولو کوچنی، خو مهم بنسټ دی. له همدې ځایه د انسان د شخصیت لومړني بنسټونه اېښودل کېږي. که یو ماشوم په یوه سالمه، بااحساسه، او د مینې ډکه کورنۍ کې وروزل شي، دا نه یوازې د هغه فردي ژوند لپاره بنسټ برابروي، بلکې د ټولنې د روښانه راتلونکي لپاره هم فکري، اخلاقي او انساني پانګه چمتو کوي.کورنۍ؛ د شخصیت جوړولو بنسټ

ماشومان له کورنۍ پیل اخلي؛ هلته د مینې، مهربانۍ، درناوي، حوصله، صداقت، او همدردۍ درسونه زده کوي. مور او پلار نه یوازې د ماشوم فزیکي اړتیاوې پوره کوي، بلکې د هغوی رواني، عاطفي، او فکري ودې ته هم زمینه برابروي. د مور نرمه غېږه او د پلار مهربان مشوره، ماشوم ته دا احساس ورکوي چې خوندي دی، اورېدونکی لري او ارزښتناک دی کله چې مور او پلار خپلمنځي اړیکې درناوي، تفاهم، او همکارۍ ته وقف کړي، دا فضا ماشومان هم له همدې اخلاقو سره اشنا کوي. بالعکس، یوه کورنۍ چې شخړې، بې‌احترامي، یا تاوتریخوالی پکې دوام ولري، ماشوم ته دا پیغام ورکوي چې ژوند ستونزمن، ډارونکی او بې‌ارزښته دی د جګړې له سیورې لاندې ماشومان

بدبختانه، افغانستان یوه له هغو ټولنو ده چې اوږدې جګړې او سیاسي بې‌ثباتۍ ځپلې ده. دا حالت کورنۍ ته هم ژور زیان رسولی. د کډوالۍ، بې‌وزلۍ، محرومیت، تعصب او تاوتریخوالي فضا، کورنۍ له خپل اصلي رسالت لرې کړې. ډېری ماشومان د مور یا پلار له لاسه ورکوي، یا له رواني فشارونو، فقر، او ښوونې ته له نه‌لاس‌رسی سره مخ دي. دا ټول عوامل د ماشوم ذهني، عاطفي او اخلاقي ودې ته سخت زیان رسوي.فکري روزنه؛ یوه ستره پانګه

یو له مهمو اړتیاوو څخه چې باید هر مور او پلار ورته متوجه وي، د ماشوم فکري روزنه ده. یوازې خوراک، جامې او تعلیم بسنه نه کوي. ماشومان باید د انسانیت، تفاهم، عدالت، زغم، او ټولنیزې همکارۍ ارزښتونه زده کړي. باید دا ورزده شي چې مینه، مهرباني، او علم، له زور، تعصب او کرکې غوره دي کله چې یو ماشوم د نورو قومونو، مذاهبو، او خلکو درناوی زده کړي، دا هغه ذهنیت دی چې یو ملت متحد ساتلی شي. هغه څوک چې د کور له دینه زغم، احترام، او متقابل تفاهم زده کړي، هغه به هېڅکله د تعصب، تندلارۍ، یا کرکې پر لور ولاړ نه شي.د ټولنې او دولت مسؤلیت په یوه سالمه ټولنه کې دولت باید کورنیو ته د سالم ژوند اسانتیاوې برابرې کړي، لکه اقتصادي ملاتړ، روزنیز پروګرامونه، د ښځو او ماشومانو ساتنه، او د زده‌کړو پراخ فرصتونه. دا اړینه ده چې ټولنه له دروندو دودونو، تاوتریخوالي، او نامناسبو فرهنګي فشارونو خلاصه شي، ترڅو کورنۍ وکولای شي خپل ماشومان په ازاد فضا کې وروزي د یوې رښتینې، سولې‌دوستې او پرمختللې ټولنې بنسټ د سالمو کورنیو له منځه راټوکېږي. هره کورنۍ، که کوچنۍ وي یا غټه، که شتمنه وي یا غریبه، دا مسؤلیت لري چې خپل ماشومان د مینې، درناوي او مسوولیت‌پالنې له مخې وروزي. دا نسل به د سبا افغانستان جوړوي؛ یو افغانستان چې پکې عدالت، همغږي، زغم او پرمختګ واکمن وي راځئ، د ټولنې بنسټ (کورنۍ) ته جدي پاملرنه وکړو. ځکه چې یوه روزل شوې کورنۍ، د یوه روزل شوي ملت لومړنی ګام دی.