له ۴۰ څخه زیاتو بنسټونو له اروپايي ټولنې وغوښتل چې له طالبانو سره تعامل ونه کړي

له ۴۰ څخه زیاتو بنسټونو له اروپايي ټولنې وغوښتل چې له طالبانو سره تعامل ونه کړي

له ۴۰ څخه زیاتو کورنیو او بهرنیو مدني او بشري حقونو بنسټونو د یوه لیک له لارې د اروپايي ټولنې له چارواکو غوښتي چې د افغان کډوالو جبري ایستل ودروي او له طالبانو سره له تعامل څخه ډډه وکړي.

د بشري حقونو د «رواداري» بنسټ د خپرې شوې خبرپاڼې له مخې، چې د پنجشنبې په ورځ د غبرګولي په ۲۸مه په اېکس کې خپره شوې، دغو مدني او بشري حقونو بنسټونو له طالبانو سره د اړیکو او تعامل د زیاتېدونکي عادي کېدو، په ځانګړي ډول د کډوالۍ په برخه کې، اندېښنه څرګنده کړې ده.

په لیک کې راغلي چې دغو کورنیو او بهرنیو بنسټونو ویلي، له طالبانو سره هر ډول کډوالیزه همکاري «باید د دې ډلې د مستقیم یا غیرمستقیم مشروعیت سبب نه شي.»

د دغو بنسټونو په وینا، د اروپايي هېوادونو له لوري د طالبانو د استازو منلو ته لېوالتیا د دې لامل کېږي چې د بشري حقونو په اړه د دغو هېوادونو ژمنې کمزورې شي.

په لیک کې راغلي: «د افغانانو د ایستلو بهیر او طالبانو ته مشروعیت ورکول د جبري بېرته ستنولو د اصل د نقض خطر زیاتوي او د بشري حقونو او بشري ناورین پراخ بحران ته لمن وهي.»

اروپايي ټولنې په دې وروستیو کې اعلان کړی چې د هغو افغان کډوالو د بېرته ستنولو په اړه د خبرو لپاره، چې له اروپا ایستل شوي، د طالبانو یو پلاوی ور بللی دی.

د اروپايي ټولنې دغه پرېکړه د مدني او بشري حقونو فعالانو له پراخو غبرګونونو سره مخ شوې او هغوی ټینګار کړی چې دا اقدام په غیرمستقیم ډول طالبانو ته مشروعیت ورکوي.