د بګرام بېرته ترلاسه کولو لپاره طالبانو سره خبرې کوو

د متحده ایالاتو ولسمشر، ډونالډ ټرمپ له برتانیا سپینې ماڼۍ ته ستنېدو سره یو ځل بیا وویل، چې د بګرام بېرته ترلاسه کولو لپاره طالبانو سره خبرې روانې دي.

هغه د سپینې ماڼۍ اوول دفتر کې ویلي، چې د بګرام ستره پوځي اډه باید امریکا نه وای پرېښې.

ولسمشر ټرمپ د پنجشنبې په ورځ هم برتانیا کې وویل، چې له طالبانو به بګرام بېرته ونیسي، ځکه په وینا یې دا د چین د څار، ترهګرۍ ځپلو او طالبانو سره د اړیکو لپاره مهمه ده.

بګرام د کابل شمال ته په پروان ولایت کې موقعیت لري، چې د تېرو شلو کلونو پر مهال د امریکا تر ټولو ستره پوځي اډه وه، خو په ۲۰۲۱ کې د امریکايي ځواکونو وتلو سره د طالبانو لاس ته ولوېده.

ورته مهال وال سټریټ ژورنال هم خبر ورکړی، چې امریکا له طالبانو سره خبرې پیل کړې دي، څو د بګرام ستره پوځي اډه بیا ونیسي او یو څه شمېر امریکايي ځواکونه پکې ځای پر ځای شي.

دغه ژورنال خبر ورکړی، چې د بګرام بیا ترلاسه کولو د خبرو مشري، د بندیانو په چارو کې د ولسمشر ټرمپ ځانګړی استازی، ادم بولر کوي.

بولر د امریکايي ډيپلوماټ، زلمي خلیلزاد په ګډون چې طالبانو سره یې د دوحې تړون لاسلیک کړی، په تېرو څو میاشتو کې دوه ځله کابل ته تللی او طالبانو سره یې پټې او ښکاره خبرې کړې دي.

طالبانو رسماً د بګرام په تړاو د ټرمپ وروستیو څرګندونو ته غبرګون نه دی ښودلای.

د خارجه وزارت یوه چارواکي یې ویلي، چې امریکا غواړي بګرام د یوې معاملې له لارې لاسته راوړي، خو دوی له سیاسي اړیکو پرته افغانستان کې د امریکا پوځي حضور نه مني.

اوس به ولیدل شي، چې طالبان او امریکا په کومه کچه معامله کوي، څو تر شاوخوا ۱۰ زره امریکايي پوځیان، تجیزات او نور اکمالات بېرته بګرام ته پیل شي او دغلته امریکا حضور پیدا کړي.

ABN