یونېسف: د افغان کډوالو له ایرانه پراخ راستنیدل د سرحدي سیمو پر منابعو او بنسټیزو خدماتو دروند فشار راوړی

کابل – د ملګرو ملتونو د ماشومانو د ملاتړ صندوق (یونېسف) په یوه تازه راپور کې ویلي چې یوازې د روان میلادي کال په لومړیو شپږو میاشتو کې له ایران څخه تر ۷۱۴ زرو ډېر افغان کډوال بیرته افغانستان ته راستنیدلي، چې له دې ډلې ۷۰ سلنه زور وویستل شول.

په دې راپور کې چې د جولای ۳۱مه خپور شوی، راغلي چې د جنورۍ له لومړۍ تر د جون تر ۲۹مې، ۲۰۲۵ پورې، ۷۱۴٬۵۷۲ افغانان له ایران څخه راستنیدلي، او یوازې په جون میاشت کې له دې ډلې ۲۵۶ زره افغانان بیرته هېواد ته داخل شوي دي.

راپور وایي چې ۹۹ سلنه راستنیدونکي هیڅ ډول قانوني اسناد نه درلودل، او ۷۰ سلنه د ایران لخوا زور وویستل شول.

یونېسف زیاتوي، پداسې حال کې چې پخوا زیاتره یوازې مجرد نارینه راستنیدل، اوس کورنۍ هم له ایستلو سره مخ دي.

یونېسف خبرداری ورکړی چې دا بې‌سارې راستنیدنه د افغانستان د سرحدي سیمو پر بنسټیزو خدماتو او منابعو سخت فشار راوړی، او د مالي سرچینو شدید کمښت د مرستندویه ادارو د چټک غبرګون وړتیا له ستونزو سره مخ کړې ده.

یونېسف دا هم ویلي چې په ۲۰۲۵ کال کې نږدې ۲۳ میلیونه افغانان — چې پکې ۱۲ میلیونه ماشومان شامل دي، یعنې د هېواد له نیمايي ډېر نفوس — بشري مرستو ته اړتیا لري.

په راپور کې دا هم راغلي چې سږ کال له ۸۵۷ زرو زیات ماشومان چې عمرونه یې له پنځو کلونو کم دي، د شدیدې خوارځواکۍ درملنې ته اړتیا لري.

Donate زموږ مرسته وکړئ