ملګري ملتونه له ایرانه راستنېدونکو افغانانو لپاره ۱۰ میلیونه ډالر مرسته کوي

ملګرو ملتونو له ایرانه راستنېدونکو زیان‌منو افغانانو د ملاتړ لپاره ۱۰ میلیونه ډالر ځانګړي کړي، څو د هغوی عاجلې اړتیاوې پوره کړي او له ناوړه چلند او استثمار څخه یې وژغوري.

تام فلیچر، د ملګرو ملتونو د بشري مرستو مرستیال سرمنشي، د سه شنبې په ورځ اعلان وکړ چې دا مرسته د ملګرو ملتونو د بیړنیو مرستو صندوق (CERF) له لارې برابره شوې ده، ترڅو له سختو شرایطو سره مخ راستنېدونکي افغانان پیاوړي کړي.

هغه زیاته کړه:

“دا مرسته به تر ټولو زیانمنو کسانو ته ځانګړې شي، تر څو له استثماره وساتل شي او اساسي مرستې ورته برابرې شي.”

هره ورځ زرګونه افغان کډوال له ایرانه شړل کېږي، خو د پناه، روغتیايي خدماتو یا خوړو ته لاسرسی نه لري، چې د دوی بشري بحران نور هم ژور کړی دی.

تر دې وړاندې، په افغانستان کې د ملګرو ملتونو مرستندویه ماموریت (UNAMA) نړیواله ټولنه وهڅوله چې د راستنېدونکو د ملاتړ لپاره خپلې مالي مرستې زیاتې کړي، ځکه هغوی د اساسي خدماتو له سخت کمښت سره مخ دي.

له ایران او پاکستان څخه راستنېدونکي افغانان له جدي ستونزو سره لاس او ګریوان دي، چې نړیوال بشري ملاتړ یې د بقا لپاره اړین ګرځېدلی دی.

یاده نوې مرسته به د خوندیتوب، لومړنیو خدماتو او د ټولنو سره د خوندي بیا یوځای کېدو په برخه کې مرسته وکړي.

بشري ادارې لا هم له نړیوالو مرستندویو بنسټونو غوښتنه کوي چې د بې‌ځایه شوو افغانانو د اړتیاوو د پوره کولو لپاره خپل ملاتړ زیات کړي، په ځانګړي ډول د روانو سیمه‌ییزو بې‌ثباتیو په شرایطو کې.

Donate د دعوت رسنیز مرکز مرسته وکړئ