اسوشیټېډ پرېس: افغانې نجلۍ له زده کړو د محرومیت له امله ځان وژنه کړې

۱۶ کلنې نجلۍ له کلونو انتظار وروسته د ښوونځي د نه پرانیستل کېدو له امله ځان وژنه کړې

د اسوشیټېډ پرېس د راپور له مخې، یوې ۱۶ کلنې افغانې نجلۍ، چې د ښوونځي د بیا پرانیستل کېدو هیله یې لرله، له اوږدې مودې نااهیلۍ وروسته ځان وژنه کړې ده.

یادې رسنۍ د زمري په ۱۰مه د فریبا د کورنۍ له قوله راپور ورکړی چې هغې، سره له دې چې د نجونو پر زده کړو بندیز لګېدلی و، هره ورځ له کوره وتله او له خپلو ښوونکو یې پوښتل چې ښوونځي به کله بېرته پرانیستل شي او کله به وکولای شي د ښوونځي یونیفورم بیا واغوندي.

د راپور له مخې، د فریبا کورنۍ وایي، نوموړې هره ورځ له ژورې نااهیلۍ سره بېرته کور ته ستنېدله او په یوه یادښت کې یې لیکلي وو چې په افغانستان کې د نجونو لپاره ژوند ډېر سخت شوی دی.

د فریبا مور اسوشیټېډ پرېس ته ویلي، د ژوند په وروستیو میاشتو کې د هغې رواني وضعیت خورا خراب شوی و. دغې رسنۍ زیاته کړې چې دا ډول پېښې پر افغان ښځو او نجونو د ټولنیزو او رواني فشارونو څرګند انعکاس دی.

له هغه وروسته چې طالبان پر افغانستان واکمن شول، له شپږم ټولګي پورته نجونې له زده کړو او ښوونځیو محرومې شوې دي، او ګڼ شمېر څارونکي او د بشري حقونو بنسټونه دغه بندیز د نجونو او ښځو د رواني ستونزو او د ځان وژنې د پېښو له مهمو لاملونو څخه ګڼي.