د افغانستان د رسنیو د سانسور او لاسوهنې د پراخېدو په اړه د «نی» بنسټ خبرداری

د افغانستان د رسنیو د سانسور او لاسوهنې د پراخېدو په اړه د «نی» بنسټ خبرداری
د مطبوعاتو د نړیوالې ورځې سره هم‌مهاله، د افغانستان د ازادو رسنیو ملاتړی بنسټ «نی» د دې هېواد د رسنیو د ازادۍ وضعیت «ډېر اندېښمنوونکی» بللی دی.
د یاد بنسټ په اعلامیه کې راغلي چې د طالبانو تر واک لاندې، نه یوازې د رسنیو ازادي، بلکې د بیان ازادي هم عملاً له منځه تللې او کورنیو رسنیو خپله خپلواکي له لاسه ورکړې ده. د دې بنسټ په وینا، ډېری خبریالان او د رسنیو کارکوونکي اړ دي چې په داسې چوکاټ کې کار وکړي چې د طالبانو د نظرونو او کړنو انعکاس وي.
«نی» همدارنګه خبرداری ورکړی چې د کورنیو رسنیو محتوا داسې بدله شوې چې یو اړخیز روایتونه او کله ناکله «جعلي خبرونه» پکې زیات شوي، او برعکس، د خلکو واقعي او ورځني ستونزې لږې منعکس کېږي.
د اعلامیې په بله برخه کې ویل شوي چې د حساسو پېښو پوښښ، لکه په ننګرهار، کونړ، پنجشېر، اندراب، بلخ او کاپیسا ولایتونو کې د ځپنې راپورونه، له جدي محدودیتونو سره مخ دي او په ډېرو مواردو کې امکان نه لري.
یاد بنسټ زیاته کړې چې رسنۍ د طالبانو د چارواکو د فعالیتونو او لیدنو په پراخولو سربېره، د بیان او د کلمو د انتخاب په برخه کې له سختو محدودیتونو سره مخ دي، تر دې چې د دې ډلې د مشرانو او چارواکو لپاره ځانګړي القاب کارول ورته لازمي ګرځول شوي دي.
په اعلامیه کې ټینګار شوی چې د طالبانو اړوند کسان په بېلابېلو کچو کې کولای شي د رسنیو په چارو کې لاسوهنه وکړي او حتی خبریالان او د رسنیو کارکوونکي تر پوښتنې لاندې راولي یا مجازات کړي.
«نی» خبرداری ورکړی چې د دې وضعیت دوام کولی شي خپلواکې رسنۍ په بشپړه توګه کمزورې کړي او په افغانستان کې د معلوماتو ازاد جریان نور هم محدود کړي