ترامپ: ډېر ژر به د افغانستان او پاکستان ترمنځ کړکیچ حل کړم

د طالبانو او پاکستان ترمنځ د سولې د دویم پړاو خبرو په لړ کې د امریکا ولسمشر ډونالډ ټرمپ وايي، هڅه کوي ژر د داوړو لوریو ترمنځ روان کړکېچ هوار کړم.

ډونالډ ټرمپ د مالېزیا په پلازمېنه (اسیان) کې یوې خبري غونډې ته ویلي، خبر شوی، چې د طالبانو او پاکستان ترمنځ د سولې دویم پړاو خبرې پیل شوې؛ خو دی هڅه کوي چې د دوی ترمنځ روانې ناندرۍ ژر حل کړي.

طالبان او پاکستان چې دوه اوونۍ وړاندې له یو بل سره خونړۍ نښتې وکړې، دواړه لوري یو بل په بریدونو، تېري او حریم نقضولو تورنوي.

دا نښتې د دواړو هېوادونو ترمنځ د تېرو څو کلونو په اوږدو کې تر ټولو مرګونې جګړې وې، چې د سیمې امنیتي وضعیت ته یې جدي اندېښنې پیدا کړې دي.

پاکستان تور پورې کوي، چې له افغانستان پاکستان ته وسلوال جنګیالي اوړي او د پاکستاني پوځیانو پر ضد بریدونه کوي؛ خو طالبانو بیا بیا د پاکستاني چارواکو دا ادعاوې رد کړې دي.

طالبانو او پاکستان تېره اوونۍ د قطر په دوحه کې د سولې لومړی پړاو خبرې وکړې او له تېرې ورځې راهیسې یې د ترکیې په استانبول کې خپل مذاکرات پیل کړي دي.

د دغو مذاکراتو د دویمې ورځې په لړ کې د طالبانو تر کنټرول لاندې ملي ټلوېزیون خبر ورکړی چې د دواړو لوریو ترمنځ له ۱۵ ساعتونو اوږدو خبرو وروسته د واکمنې ډلې استازو پاکستاني لوري ته یوه مسوده ورکړې او له پاکستان یې غوښتي چې د افغانستان هوايي او ځمکنی حریم به نه نقض کوي او هېڅ وسلوالې ډلې ته به اجازه نه ورکوي چې د پاکستان له خاورې د افغانستان پر ضد فعالیت وکړي.

ملي ټلوېزیون زیاته کړې، چې د تېرې ورځې د مذاکراتو په لړ کې پاکستاني لوري هم طالبانو ته خپله دویمه مسوده سپارلې او خپلې غوښتنې یې شریکې کړې دي.

د ډونالډ ټرمپ د دغو څرګندونو په تړاو تر اوسه طالبانو او پاکستاني چارواکو نظر نه دی ورکړی.

ډونالډ ټرمپ په مالېزیا کې د ټایلېنډ او کمبوډیا ترمنځ د سولې د تړون په مراسمو کې ویلي، چې د پاکستان مشران ښه خلک دي او دی به یې له طالبانو سره اوسنۍ ستونزې ژر حل کړي.

دا په داسې حال کې ده چې د روان زېږدیز کال په اوږدو کې چې هند او پاکستان له یو بل سره نښتې وکړې او ډونالډ ټرمپ دا جګړه ودروله، پاکستان د دغه کړکېچ په را کمولو کې د ټرمپ رول ستایلی و او ان تر دې چې پاکستاني لوړ پوړو چارواکو څو ځلې ډونالډ ټرمپ د سولې نوبل جایزې ته نومولی و دی.

ABN