د افغانستان ملي کرکټ لوبډلې د ماتو لاملونه او د ښه‌والي لارې

ګرانو لوستونکو!
زموږ او د ولس یوازینۍ خوښي او خوشحالي د کرېکټ بریاوې دي. ملي لوبډله مو تر ډېره بریالۍ روانه وه، خو له بده مرغه، په دې وروستیو کې له پرله‌پسې ناکامیو سره مخامخ شوې ده. زه که څه هم د کرېکټ مسلکي پوهه نه لرم، خو د خپلو زامنو د تجربو او خبرو له مخې مې یو څه درک کړی دی. له همدې امله غواړم د ملي لوبډلې د ماتې اصلي عوامل روښانه کړم.
لنډه مقدمه
په وروستیو سیالیو کې زموږ ملي کرکټ لوبډلې هغه بریاوې ترلاسه نه‌کړې چې ولس یې تمه لرله. دا ماته یوازې د لوبې د میدان نه، بلکې د ټیم د فضا، اړیکو او مدیریت له کړنو سره هم تړاو لري. لاندې یې اصلي عوامل او د اصلاح لارې په ساده ژبه بیان شوي دي.
د ماتو اصلي لاملونه
1. بې‌ثباته توپ‌وهنه:
لوبغاړي یو ډول نه‌دي لوبېدلي. منځنۍ برخه کمزورې وه او پلان نه‌وو منظم.
2. د هدف تعقیب ګډوډ و:
د همغږۍ او منظم پلان نشتوالی و. هر لوبغاړی خپل ډول لوبه کوله.
3. بالران بې‌نتیجې پاتې شول:
په لومړیو او منځنیو اوورونو کې فشار نه‌دی ساتل شوی او ویکټې کمې اخیستل شوې.
4. فیلډنګ یا میدان‌ساتنه ضعیفه وه:
د ډراپ کیچونو، تېروتنو او ناسم پاسونو له امله د حریف لپاره اسانه موقعې جوړې شوې.
5. ذهني فشار او بې‌پلانۍ:
د سختو حالاتو پر مهال لوبغاړي پرېشانه کېږي او سم فکر نه‌شي کولای.
6. د خپلوی او ډله‌بازۍ اغېز:
په ټیم کې کله ناکله خپلوي، ډله‌بازۍ او ناسم روابط د انصاف او وړتیا پر ځای پرېکړې اغېزمنوي. دا حالت د وړ کسانو حوصله ماتوي او د یووالي فضا له منځه وړي.
7. د ملګرتیا او اړیکو کمزوري:
د لوبغاړو ترمنځ باور، همکاري او د یو بل ملاتړ کم شوی. د ټیم روحيه سړه ده او د «یو زړه، یو هدف» احساس کمزورې شوی.
8. میراثیت او زاړه دودونه:
ځینې وخت د زاړه فکر او اړیکو پر اساس پرېکړې کېږي، نه د استعداد او کارکردګۍ له مخې. دا د پرمختګ مخه نیسي او نوې وینه نه پرېږدي چې راشي.
د ښه‌والي او پرمختګ لارې
1. ذهني او فزیکي روزنه پیاوړې کړي.
لوبغاړي دې د فشار د زغملو، صبر او تمرکز لپاره روزنه ترلاسه کړي.
2. منځنۍ کرښه ټینګه وساتي.
یو یا دوه تجربه لرونکي توپ‌وهونکي دې د منځنۍ برخې لپاره ټاکل شي.
3. فیلډنګ ته جدي تمرکز وشي.
منظم تمرینونه، د تېروتنو اصلاح، او د نړیوال معیار فیلډنګ جوړول ضروري دي.
4. د لوبې لپاره روښانه پلان جوړ کړي.
هر لوبغاړی دې پوه وي چې د لوبې په کوم پړاو کې یې دنده څه ده.
5. ځوانو استعدادونو ته فرصت ورکړي.
د کورني کرکټ له لارې دې نوې وینه او انرژي ټیم ته راوستل شي.
6. ښه روزونکي او مشاورین وګماري.
د نړیوالو تجربو لرونکي کسان دې د تخنیکي، رواني او د ټیم جوړونې برخه کې مرسته وکړي.
7. د انصاف، مسلکیتوب او یووالي فرهنګ رامنځته کړي.
بورد باید د خپلوی، ملګرتیا، ډله‌بازۍ او میراثیت پر ځای صلاحیت، نظم او کارکردګي ته ارزښت ورکړي.
پایله
افغان کرکټ یوازې د لوبې نوم نه‌دی، دا د ولس احساس او وياړ دی. خو احساس ته ستراتیژي، روزنه او یووالی هم پکار دی.
که بورد، لوبغاړي او ملت یو موټی شي — نو سبا به د افغانستان بیرغ د بریا په میدان کې لوړ وي.
خو بریا هغه وخت شونې ده چې لوبډله د دوستۍ، پر ځای د عدالت، د اړیکو پر ځای د وړتیا، او د خپلوی پر ځای د ملي احساس بنسټ ولري.

د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه

DNB Bank AC # 0530 2294668 :د دعوت بانکي پته 
 NO15 0530 2294 668: له ناروې بهر د نړیوالو تادیاتو حساب
Vipps: #557320 : د ویپس شمېره 

  Donate Here