د جنوبي اروپا هېوادونو د اروپايي کمېسیون د دفاعي پور پلان مخالفت-د ملي بودجې د کارولو غوښتنه

بروکسل – د اروپایي کمېسیون د مشرې اورسولا فون ډېرلاین هغه پلان چې د دفاعي بودیجې د زیاتولو لپاره د ۱۵۰ میلیارده یورو د پور اخیستلو وړاندیز کوي، د جنوبي اروپا هېوادونو د مخالفت له کبله له ستونزو سره مخ شوی دی.

فرانسه، ایټالیا، او اسپانیا د دې پلان پر وړاندې خپل مخالفت څرګند کړی او د پور پر ځای یې د اروپايي اتحادیې له ګډ صندوق څخه د مالي مرستو غوښتنه کړې ده. د دغو هېوادونو په وینا د پورونو زیاتېدل د دوی اقتصاد ته زیان رسولی شي او د هغوی د مالي ثبات پر وړاندې لوی خنډ دی.

د ایټالیا صدراعظمې جارجیا میلوني په دې اړه ویلي: “د فون ډېرلاین پلان د غړو هېوادونو د ملي پورونو پر بنسټ ولاړ دی، چې د جنوبي اروپا هېوادونو اقتصادونه یې د لا زیات فشار لاندې راولي.”

په ورته وخت کې، آلمان او د شمالي اروپا نور هېوادونه د دې نظر مخالف دي او د ګډ پور پر ځای د ملي بودیجو د کارولو غوښتنه کوي. د هالنډ صدراعظم ډیک سهوف ویلي: “د یورو بانډونو ته هېڅ اړتیا نشته.”

فون ډېرلاین دا پلان د اوکراین د جګړې له امله د اروپایي دفاعي وړتیاوو د پیاوړتیا لپاره وړاندې کړی و. د دې پلان موخه د وسلو د ګډې پېرودنې، د دفاعي بنسټونو د تقویې، او د اروپایي اتحادیې د ځان بسیاینې زیاتول دي.

ایټالیا او اسپانیا هم غوښتنه کړې چې د نظامي بودیجې اصول پراخ شي او په کې د سایبري امنیت، سرحدي کنټرول، او د مهمو تأسیساتو د خوندیتوب لپاره لګښتونه هم شامل شي. دوی همدارنګه د مالي اصولو د نرمولو غوښتنه کړې ده، څو د اروپایي اتحادیې په غړو هېوادونو کې د دفاعي لګښتونو زیاتوالی توجیه شي.

تمه کېږي چې د دې کړکېچ د حل لپاره به د اروپایي اتحادیې په راتلونکي سرمشریز غونډه کې، چې په جون کې ترسره کېږي، د دې پلان په اړه وروستۍ پرېکړه وشي.