اوچا: په افغانستان کې د خوارځواکۍ کچه لا نوره هم لوړه شوې

د ملګرو ملتونو د بشري مرستو د همغږۍ دفتر (اوچا) ویلي چې د ۲۰۲۵ کال په پرتله د افغانستان په ۲۶ ولایتونو کې د خوارځواکۍ وضعیت لا خراب شوی دی.

د اوچا د راپور له مخې، چې د دوشنبې په ورځ، د غبرګولي په ۲۵مه خپور شوی، په ۲۰۲۶ کال کې د افغانستان د تغذیې وضعیت په اندېښمنوونکې توګه مخ پر خرابېدو دی او د خوارځواکۍ پېښې زیاتې شوې دي.

راپور څرګندوي چې هلمند، دایکندي، زابل، بغلان، ارزګان، پکتیکا، نورستان، سرپل، غور، کندهار، فاریاب او لوګر هغه ۱۲ ولایتونه دي چې له بحراني وضعیت سره مخ دي.

اوچا زیاته کړې چې د شپږو میاشتو څخه کم عمره نږدې ۴۰ سلنه ماشومان د شدیدې خوارځواکۍ او طبي ستونزو له امله د درملنې لپاره بستر کېږي، چې دا چاره پر روغتیايي خدمتونو او د کوچنیانو پر وضعیت سخت فشار راوړي.

دې ادارې خبرداری ورکړی چې تر دوو کلونو کم عمره ماشومان تر ټولو ډېر زیانمن شوي؛ ځکه د شدیدې خوارځواکۍ ۸۳ سلنه او د منځنۍ کچې خوارځواکۍ ۷۷ سلنه پېښې په همدې عمر ډله کې ثبت شوې دي.

د اوچا په وینا، د منځنۍ کچې خوارځواکۍ شاوخوا ۱۹ سلنه پېښې هم د لوړ خطر په حالت کې دي. دغه سازمان وایي چې په افغانستان کې د طالبانو له واکمنېدو وروسته بېوزلي زیاته شوې ده.

د بېکارۍ او بېوزلۍ پراخېدو د بشري مرستو اړمنو شمېر هم لوړ کړی، او ګڼې کورنۍ آن د خپلې ورځې او شپې ډوډۍ برابرولو توان نه لري.