د ملګرو ملتونو د ښځو ادارې خبرداری: د ښځو او نجونو خوندیتوب د بشري حقونو بنسټیز اصل دی

د ملګرو ملتونو د ښځو اداره (UN Women) په یو تازه پیغام کې ټینګار کړی چې د ښځو او نجونو امنیت او خوندیتوب د بشري حقونو له بنسټیزو حقونو څخه دی، او هېوادونه مکلف دي چې د جنسي تاوتریخوالي د مخنیوي لپاره عاجلې، عملي او دوامدارې هڅې وکړي.

په دې پیغام کې چې نن، د یکشنبې په ورځ، د تلې ۲۷مه خپور شوی، راغلي: «هره ښځه او نجلۍ حق لري چې په هر ځای کې په کور، کار ځای، ښوونځی، کوڅه او سړک ځان خوندي احساس کړي.»

ملګرې ملتونه خبرداری ورکوي چې د جنسیت پر بنسټ تاوتریخوالی نه یوازې د بشري حقونو ښکاره سرغړونه ده، بلکې د هېوادونو د ټولنیز او اقتصادي پرمختګ پر وړاندې یوه جدي خنډ هم ګڼل کېږي.

ملګرو ملتونو زیاته کړې چې د وېرې احساس د نړۍ د میلیونونو ښځو د ورځني ژوند یو تریخ حقیقت دی. کورنی تاوتریخوالی، جبري ودونه، په سړکونو کې ځورونه، او د روغتیایي او ښوونیز خدماتو محدود لاسرسی هغه جدي ستونزې دي چې ښځې ورسره مخ دي.

د ښځو د ملګرو ملتونو ادارې په وینا، تر هغو چې ښځې ونه شي کولای له وېرې پرته او په ازادۍ ژوند وکړي، هېڅ ټولنه به ریښتینی پرمختګ ونه کړي.

په داسې حال کې چې د ښځو اداره له نړیوالو دولتونو غواړي د ښځو پر وړاندې د تاوتریخوالي د پای ته رسېدو لپاره بېړني ګامونه پورته کړي، د افغانستان د ښځو او نجونو وضعیت د نړۍ له تر ټولو اندېښمنو بېلګو څخه شمېرل کېږي. میلیونونه افغان مېرمنې نه یوازې له خپلو بنسټیزو حقونو بې‌ برخې دي، بلکې هره ورځ له ډول‌ ډول تاوتریخوالي، وېرې، تبعیض او سختو ټولنیزو او قانوني بندیزونو سره لاس او ګرېوان دي.