افغانستان کې سیلابونو او ږلۍ ۳۶ تنه مړه کړي، ارقام لا وروستي نه دي

د دې ادارې د اطلاعاتو او عامه اړیکو ریس مولوي عبدالله جان سایق په یو ویډیو بیان کې چې نن ( د کب په ۸مه) د یادې ادارې پر اېکس پاڼه خپور شوی ویلي “زموږ د ولایتي ریاستونو د لومړنیو معلوماتو له مخې په ټول هیواد کې د طبیعي پېښو له امله له بده مرغه ۳۶ کسان شهیدان شوي او ۴۰ نور ټپیان دي، دغه شان ۲۴۰ کورونه په بشپړ او ۶۱ نور په قسمي ډول ویجاړ شوي دي، همدارنګه سلګونه جریبه کرنیزې ځمکې هم ویجاړې شوي دي.”

نوموړي ویلي چې د زیانمنو سره د مرستې لپاره سیلاب ځپلو سیمو ته د دوی د سروي ټیمونه رسېدلي او ژر به له خلکو سره مرستې وشي.

سایق دا هم ویلي چې د دغو سیلابونو او واورو له امله په یو شمېر ولایتونو کې لارې هم تړل شوي چې د طالبانو حکومت د ټولګټو چارو وزارت له لوري ېې د بېرته پرانستلو هڅې روانې دي.

که څه هم نوموړي نه دي ویلي چې په وروستیو سیلابونو او اورښتونو کې په کومو ولایتونو کې خلکو ته زیانونه اوښتي خو د راپورنو پر بنسټ فراه، هلمند او کندهار هغه ولایتونه دي چې سیلابونو، ږلۍ او سخت اورښت په کې یو شمېر کسان مړه او ژوبل کړي دي.

فراه بیا تر ټولو ډېر ځپل شوې دی.

چارواکو ویلي چې د دې ولایت په بکواه او پشت رود ولسوالیو کې سختې ږلۍ او سیلابونو ۲۲ کسان مړه کړي او څلور یې ژوبل کړي دي.

د فراه ولایت د بکواه ولسوالۍ یوه اوسېدونکي غلام الله ازادي راډيو ته وویل ” دفراه په قلعه کاه او د پشت رود ولسوالۍ په ګجراباد او په بکواه ولسوالۍ کې پرون ډېر شدید باد، باران، ږلۍ او سیلابونه وو، زیات شمېر خلکو ته مرګ ژوبله اوښتې ده، زما خپله کور نړېدلی دی، بیګاه مو اسمان لاندې شپه تېره کړې ده، خلک له ډېرو ستونزو سره مخ دی، خلکو ته هیڅ نه دي ورپاتې.”

هلمند او کندهار دوه نور هغه ولایتونه دي چې د طالبانو د سیمه ییزو ادارو او چارواکو د معلوماتو له مخې ۱۵ کسان په کې مړه شوي او ۸ نور ژوبل شوي دي.

د کندهار ښار د پنځمې ناحیې یوه اوسېدونکې محمد اغا چې د سیلاب له امله یې کور نړېدلی ازادي راډيو ته وویل “خامه سرکونه او خامه کورونه یې ډېر نړولي دي، زموږ کور یې هم نړولی دی، الحمد الله څوک ژوبل شوي نه دي، خو نورو سیمو کې یې تلفات اړولي دي او خلکو ته یې درانه مالي تاوانونه اړولي دي.”

دغه سیلاب ځپلي د طالبانو له حکومته او نړیوالو مرستندویه موسسو د مرستو غوښتنه کوي.

دا سیلابونه او اورښتونه په داسې حال کې دي چې وار له مخه د افغانستان په یو شمېر سړو ولایتونو کې د واورو ورېدو له امله لویې لارې تړل شوي دي او خلک له ګڼو ستونزو سره مخ دي.

پرون سې شنبه د سختو واور له امله د سالنګ لویه لار د ټرافیکو پر مخ وتړل شوه چې نن چهارشنبه ماسپښین د راپور تر لیکلو هم تړلې وه.

د بامیان، دایکنډي، بدخشان او تخار ولایتونو له ځینو سیمو هم د سختو واورو د ورېدو په پایله کې د ځینو لارو د تړل کېدو راپورونه ورکړل شوي دي.

افغانستان د نړۍ له هغو ګوتو په شمېر هېوادونو څخه دی چې اقلیمي بدلون سخت ځپلی دی.

تېر ۲۰۲۴ کال هم دا هیواد له سختو سیلابونو سره مخ وو چې له امله یې سلګونه کسانو ته مرګ ژوبله واوښته.

د تېر کال په مۍ په میاشت کې بغلان سختو سیلابونو وځاپه چې د رسمي شمېرو له امله لږ ترلږه ۳۱۵ کسان یې مړه او له ۱۶۰۰ ډېر نور یې ژوبل کړل.

ازادی رادیو