امریکا سفارت: تېرو ۱۲ کلونو کې طالبانو ۴۰ زره ملکي وګړي وژلي

د امریکا سفارت د خبرپاڼې په خپرولو سره ویلي، چې په تېرو ۱۲ کلونو کې د طالبانو په بریدونو او ماین چاودنو کې ۴۰ زره ملکي وګړي وژل شوي دي.
د امریکا سفارت وايي، چې په دې وروستیو کې د طالبانو له لوري د تاوتریخوالي کچې لوړېدو اندېښمن کړي او زیاته کړې یې ده، چې که چېرته طالبان د خپلو بریدونو کچه ټیټه نه کړي ناورین به رامنځته شي.
د امریکا سفارت د ارقامو له مخې، په یاده موده کې د طالبانو بریدونو کې ۷۰ زره نور ملکي وګړي ټپیان شوي دي.
په یاده اعلامیه کې د امریکا د سفارت ویاند «نډ پرایس» له قوله راغلي، چې طالبان د جګړې پر مهال بشري حقونو ته پام نه کوي، چې دا بشري جنایت ګڼل کیږي.
نوموړي ویلي، چې امریکا هېڅکله له هغو ډلو څخه پلوي نه کوي او نه ورسره مرسته کوي، چې بشري حقونه تر پښو لاندې کوي او پر خلکو تحمیلي حکومت رامنځته کول غواړي.
خو په ورته وخت کې طالبانو د بریدونو او د عامه تاسیساتو د ویجاوړلو کچه لوړه کړې؛ ترڅو د زور له لارې قدرت ته ورسیږي.
دغه راز بیا په کور دننه او بهر سیاسي شنونکي پر دې باور دي، چې طالبان په داسې کړنو یوازې د خلکو تر منځ ډار خوروي او په نژدې راتلونکي کې به ډیری افغانان د دوی پر وړاندې قیام وکړي.