اتریش یو افغان د جرمي سابقې له امله کابل ته شړلی دی

اتریش د طالبانو له واکمنۍ وروسته لومړی ځل یو افغان د جرمي سابقې له امله بېرته کابل ته شړلی دی.

د اتریش لومړي وزیر کریستیان شتوکر ویلي، دغه افغان چې د «جدي جنایي جرمونو» په تور محکوم شوی و، له څو کلونو وروسته کابل ته شړل شوی دی.

اتریشي چارواکو ویلي، چې دغلته «مجرمین» نه پرېږدي او نږدې وخت کې به دا لړۍ پراخه کړي.

په ورته وخت کې، د بخښنې نړیوال سازمان دا اقدام سخت غندلی او ویلي یې دي چې افغانستان لا هم خپلو وګړو ته د نړۍ په خطرناکو هېوادونو کې دی.

دغه سازمان ویلي: «هغه دولتونه چې خلک یو داسې نظام ته بېرته استوي چې له خپلو وګړو سره ظلم کوي، د نړیوالو بشري قوانینو ښکاره سرغړونه کوي. دا ډول عمل بشري حقونو سره خیانت دی.»

د اروپایي هېوادونو له لوري د افغانانو د شړلو لړۍ وروستیو میاشتو کې چټکه شوې ده. د جولای په میاشت کې جرمني هم ۸۱ افغانان چې د جرمونو په تور محکوم شوي وو، کابل ته شړلي وو.

اپورونه ښيي چې د اتریش په ګډون یو شمېر اروپايي هېوادونو له طالبانو سره محدود تماسونه ټینګ کړي، څو د افغان کډوالو د ستنولو، قانوني چارو او قونسلګرۍ خدماتو په اړه همغږي رامنځته کړي.

د دغه شړل شوي افغان په تړاو نور جزییات نه دي ورکړل شوي او نه هم طالبانو تراوسه په دې تړاو څه ویلي دي.

سره له دې، د بشري حقونو بنسټونه ټینګار کوي چې تر هغه چې افغانستان کې سیاسي ثبات، د ښځو حقونه او د ژوند خوندیتوب تضمین نه وي، د افغانانو جبري شړل باید بند شي.

ABN