د ملي انکشاف شرکت او د موټرو د تولید ارزښت

مقدمه:
د ملي انکشاف شرکت د افغانستان له هغو مهمو دولتي بنسټونو څخه دی، چې د هېواد د اقتصادي ودې، صنعتي پراختیا، او تولیدي خودکفایۍ په هدف رامنځته شوی دی. دا شرکت د هېواد‌پال، ژور فکر لرونکي او مسلکي رهبر ښاغلي عطاش تر رهبرۍ لاندې، په پیاوړي عزم او ابتکاري روحیې سره، هڅه کوي څو د تولید، تخنیکي ظرفیتونو، او خدماتي سکتور له لارې، هېواد د اقتصادي استقلال، صنعتي پرمختګ او تخنیکي خودبساینې پر لور رهبري کړي.
موټر جوړونه – یو ستر صنعتي فرصت:
د ملي انکشاف شرکت له لوري پیل شوې د موټرو تولید پروژه د افغانستان د صنعتي پرمختګ په لاره کې یو بې‌ساری او تاریخي ګام بلل کېږي. دا پروژه نه یوازې د وارداتو اړتیا راکموي، بلکې زرګونه هېوادوالو ته د کار زمینه برابروي، مسلکي ظرفیتونه غښتلي کوي، او هېواد ته د تکنالوژۍ او صنعت د ودې نوې دروازې پرانیزي.
د موټر جوړونې برخې ارزښتناکې ګټې:
۱. اقتصادي خپلواکي:
د موټرو داخلي تولید د بهرنیو وارداتو اړتیا راکموي، او دا کار د اسعارو د وتلو مخنیوی کوي، چې دا خپله د ملي اقتصاد د پیاوړتیا سبب ګرځي.
۲. کاري فرصتونه:
د موټر جوړونې پروژې سلګونه ځوانان مستقیم او زرګونه نور غیر مستقیم ډول په کاري جریان کې راولي، چې دا د بې‌کارۍ د کچې د راټیټولو لپاره خورا اغېزناک اقدام دی.
۳. تخنیکي او مسلکي روزنه:
د یادې پروژې له لارې زرګونه ځوانان په تخنیکي مهارتونو سمبالېږي، او دا یو بنسټیز تحول دی چې مسلکي قشر ته لار هواروي.
۴. صنعتي پراختیا:
موټر جوړونه د فلزکارۍ، انجنیري، الکترونیک، پلاستیک، ټایر، او نورو اړوندو برخو لپاره هم بازار او فرصتونه رامنځته کوي.
چیلنجونه او حل‌لارې:
که څه هم د موټر جوړونې پروژه یو ملي نوښت دی، خو له ځينو مهمو ستونزو سره هم مخ ده، چې باید ورته اساسي حل‌لارې ولټول شي:
د عصري ماشینونو او تولیدي تجهیزاتو کمښت
د نړیوال معیار مطابق خامو موادو ته محدود لاسرسی
د متخصصینو، تخنیکي کدرونو او انجینرانو کموالی
د خصوصي سکتور او پانګوالو د باور کمښت
د دغو ننګونو د حل لپاره د دولت، خصوصي سکتور، او نړیوالو همکارانو ګډه همغږي او ملاتړ حیاتي اهمیت لري.
پایله او ستاینه:
د ملي انکشاف شرکت لا له وړاندې د قوش‌تپې سترې زېربنایي پروژې په بریالۍ تطبیق سره وښوده، چې که سالم مدیریت، ملي اراده، او تخصص سره یو ځای شي، نو زموږ هېواد هم کولای شي د پرمختګ، تولید او صادراتو مرکز شي.
د موټرو جوړونې پروژه د افغانستان لپاره د خودکفایۍ یو تاریخي فرصت دی، چې باید ملاتړ یې وشي. که دولت، خصوصي سکتور او نړیوال شریکان ګډ کار وکړي، نو افغانستان کولای شي د سیمې په کچه د موټر جوړونې په برخه کې سیال حضور ولري.
زه له دې ځایه د دغه ستر ملي شرکت ټولو مسوولینو، په ځانګړي ډول د ښاغلي عطاش هڅې، نوښتونه او زحمتونه له د زړه له تله تقدیروم. د هغه پر وطن‌پالنه، باور، مدیریت، او تخنیکي لید ویاړ لرو. همداراز، د شرکت ټولو تخنیکي انجنیرانو، کارکوونکو، او مسلکي ټیم ته د بریا هیله کوو.
سپارښتنه:
موږ له خصوصي سکتور، ملي سوداګرو او دولتي چارواکو غوښتنه کوو، چې د یاد شرکت انجنیران، کارګران، او ابتکار کوونکي نسلونه ونه‌څنګوي؛ بلکې د هغوی د تشویق او ملاتړ لپاره عملي ګامونه پورته کړي، د سرپناه، ماشومانو د تعلیم، صحي خدمتونو او نورو اړینو امکاناتو برابرول دې د مسؤلینو اولیت وي. ځکه چې روان ذهن، باعزته ژوند، او ملي مینه کولای شي دا قشر د هېواد د راتلونکي لپاره لا نور نوښتونه او پرمختګونه رامنځته کړي.
د پرمختللی او خپلواک افغانستان په هيله

سوداګریز اعلانات او تبليغات

د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه

DNB Bank AC # 0530 2294668 :د دعوت بانکي پته 
 NO15 0530 2294 668: له ناروې بهر د نړیوالو تادیاتو حساب
Vipps: #557320 : د ویپس شمېره 

  Donate Here