کورونا او لنډۍ

«کورونا» نا روغي، د لنډیو په غېـږ کې

شپږپنځوسمه برخه

کورونا ټوله درد او غم دی

چې درد لري هغه به نه کوي خوبونه

 

یار سلامت و روغ رمټ و

د کورونا له لاسه تور لحد ته ځینه

 

له تورو غرونو پناه یاره

زه کورونا یمه وروستی دیدن کومه

د کورونايي لنډیو د شپږپنځوسمې برخې له پاره مې دا نوې لنډۍ راپیدا کړې دي:

چې کورونا وي ځان ترې ساته

که گیلمن شو ورته وړاندې کړه عذرونه

 

جانانه ستا په کورونا کې

په منډه لاړمه تر ټولو زیارتونه

 

کورونا مه هېروه یاره

چې دې په یاد وي نو کوې به احتیاتونه

 

کورونا شته غفلت ښه نه دی

چې ترې منکر دي، په ځان اور به لگوینه

 

کورونا ټوله درد او غم دی

چې درد لري هغه به نه کوي خوبونه

 

کورونا گل نه دی ازغی دی

چې څوک ازغی زړه کې لري څه به کوینه

 

له کورونا نه دې خدای ساته

که گرفتار شوې، غورځوي دې په کورونه

 

له کورونا مې زړگی تور دی

چې څو ژوندی یم، وابېنخلمه نومونه

 

یار سلامت و روغ رمټ و

د کورونا له لاسه تور لحد ته ځینه

 

چې یار ته ځې خطر قبول کړه

له کورونا سره خو شته دي خطرونه

 

یار کورونا موسم کې راغی

چې دیدن غواړم، نو قبول مې دي رزکونه

 

پلار مور نعمت دی پام پرې بویه

کورونا گرځي پاخه عمري خوښوینه

 

د کورونا له درده مړ شو

ناڅاپه ولوید رقیبان خوشالوینه

 

له تورو غرونو پناه یاره

زه کورونا یمه وروستی دیدن کومه

 

احتیاط کار دغسې وي یاره

چې خلک راشي، نو کوڅه هم چپـوینه

 

که ته له ما سره یاري کړې

په کورونا کې دې هم اخلم احوالونه

 

ستا کورونا کې سرگردان یم

چې چېرې ځمه لار کې خورمه تیندکونه

 

ولې له ما نه لرې گرځې

کورونا نه یم پر ما وکړه باورونه

 

چې کورونا شوم رانه لاړې

ستا په دیدن پسې وړې سلگۍ وهمه

 

په انتظار کې اوسه یاره

له کورونا نه چې لږ ښه شوم دربه شمه