بشري حقونو کمېسیون: د طالبانو له لوري د تاوتریخوالي لوړېدل او د جګړې د پراخېدو خبرتیا د اندېښنې وړ ده

د طالبانو له لوري د جګړې تاکتیکونه ورځ تر بلې خونړی کیږي، چې د اندېښنې وړ دي.
د افغانستان د بشري حقونو خپلواک کمیسیون مشرې شهرزاد اکبر ویلي، چې طالبان ورځ تر بلې د تاوتریخوالي کچه لوړي؛ تر څو د جګړې له لارې واک تر لاسه کړي؛ خو د دوی بریدونو کې یوازې ملکي وګړو ته تلفات اوړي.
نوموړې پر طالبانو غږ کړی، چې په بې رحمانه ډول دې د ملکي وګړو له وژنې لاس واخلي او د سولې خبرې دې مخته یوسي.
شهرزاد پر نړیوالې ټولنې او د بشر حقونو پر نړیوالو بنستونو غږ کړی، چې پر طالبانو فشار راوړي؛ تر څو د تاوتریخوالي کچه کمه کړي.
نوموړې دا هم زیاته کړې، چې نړیوال باید د طالبانو له لوري ملکي وګړو ته د تلفاتو په اړه څېړنې وکړي او عاملینو ته دې سزا واورول شي.
په ورته وخت کې د ملګرو ملتونو د مرستندویې ټولنې مشرې “دېبورا لاینز” د افغان سولې لپاره د افغان حکومت له پلاوي سره په لیدنه کې ویلي، چې د طالبانو له لوري د ملکي وګړو تلفات او د تاوتریخوالي کچه اوج ته رسېدلې ده.
لاینز زیاته کړې، چې طالبان باید له خپلو بریدونو لاس په سر شي او د جګړې پر مهال دې بشري حقونو ته پاملرنه وکړي.
نوموړې د طالبانو له لوري د جګړې د شدت په اړه خپله اندېښنه څرګنده کړې، او ویلي یې دي، چې ملکي وګړو ته د تلفاتو اړولو مجرمین به خامخا سزا وویني.