د طالبانو اوربند؛ د هرکلي پر ځای غبرګونونه راپارولي

 د کوچني اختر د را رسېدو له کبله د طالبانو درې ورځني اوربند د طالبانو پر وړاندې د عام ولس کرکه لا ډېره کړې.
خلک نیوکه کوي، چې طالبان هره ورځ ملکي خلک وژني، عامه ځایونه، مکتبونه، پلونه او سرکونه ورانوي او اوس په درې ورځني اوربند غواړي، چې د خلکو په منځ کې محبوبیت پیدا کړي؛ نو ځکه دوی ته یاد اوربند هیڅ د منلو نه دی.
دوی وایي که طالبان ریښتیا هم د نورو په اشاره جګړه نه کوي؛ نو له افغان حکومت سره دې دایمي اوربند وکړي، تر څو یوې پایدارې سولې ته ورسېږو.
بل طرف بیا د ټولنیزو رسنیو یو شمېر کار کوونکي په دې اند دي، چې طالبانو په وروستیو دوه اونیو کې د افغان ځواکونو له لوري زیات تلفات ولیدل او اوس له پاکستان هېواد څخه د خپلو جنګیالیو د پوره کولو لپار د ۳ ورځني فرصت په تمه دي.
د ټولینزو رسنیو کار کوونکي پر طالبانو دا نیوکه کوي، چې په دې وروستیو کې یې د ملکي وګړو مرګ ژوبلې ته مخه کړې او غواړي له همدې لارې وحشت خپور کړي.
وروسته له هغې، چې په ټول هېواد کې د افغان حکومت له لوري پر طالبانو تر ټولو سخت عملیات پیل شول او یادې ډلې ته یې درانه تلفات واړول؛ نو طالبانو د اوربند وړاندیز وکړ.
بل طرف بیا افغان حکومت وایي، چې طالبانو ته د اوربند غځولو زارۍ نه کوي؛ خو ترې غواړي، چې د ماشومانو او ملکي وګړو مرګ ژوبله دې ودروې او له افغان ځواکونو سره دې د جګړې ډګر ته را ودانګي.