له سولې وروسته طالبان په بل نوم جګړه کوي

د ملي امنیت عمومي رییس احمد ضیاء سراج چې مشرانو جرګې ته یې نن مالومات ورکول، په خپلو خبرو کې اندیښنه وښوده، که د سولې پروسه بریالۍ هم شي، امکان شته چې طالبان په یو بل نوم باندې جګړې ته دوام ورکړي.

هغه ځینې مالومات له مشرانو جرګې سره شریک کړل چې ښيي طالبان له سولې وروسته دا اراده نه لري چې په مکمل ډول سولې پروسې سره یو ځای شي او د افغانستان جګړه پای ته ورسوي.

دا انديښنه وروسته له هغې ښودل کیږي چې د طالبانو په منځ کې د اختلافاتو وضعیت ورځ تر بلې لوړیږي، ځینې له امریکا سره هوکړه باندې راضي نه دي او ځینې نور بیا له افغان حکومت سره خبرو باندې ملاحظات لري.

له همدې کبله ځینو ډلو جګړې کې شدت راوستی، ځینو نورو هدفي وژني پيل کړي او ځینې نور د فتحې خوبونه ګوري چې کابل ته باید په فاتحانه انداز دننه شي.

د ملي امنیت د ریاست  د مالومات په اساس ، وروستۍ هدفي وژني طالبان کوي او د دې لپاره یې ځانګړې ډله جوړه کړې ده.

د ملي امنیت عمومي رییس مشرانو جرګې ته وویل چې وروستۍ هدفي وژنې او مقناطیسي مایونونه چې هره ورځ له خلکو قرباني اخلي دعبیده کاروان په نوم دطالبانو دهغې ډلې کار دی چې دامریکا سره دسولې له هوکړې وروسته یې په لوګر کې رامنځ ته کړې .

د عبیده په نوم ډلې لوګر کې څو ناستې کړي او مسوولو کسانو ته یې لارښوونه کړې چې ښارونو کې دې هدفي وژني او مقناطیسي بمونو چاودنې زیاتې کړي، دا ډله د طالبانو د سیاسي ډلې له لیدلوري سره مخالف روانه ده او سیاسي ډلې سره یې سخت اختلاف راپورته شوي دي.

د امنیت د مالومات له مخې، طالبانو ۱۸۲۰۰ بریدونه په نهه میاشتو کې کړي چې ۹۹ سلنه مسوول طالبان دي، د دې بریدونو اکثریت قربانیان ملکي وګړي او یا ملکي مامورین دي چې د طالبانو په بریدونو کې قرباني شوي دي.

طالبان اوس مهال د یوې داسې ستراتيژۍ په تطبیق بوخت دي چې یواځې شور جوړ کړي، وضعیت خراب کړي، دا چې څوک وژل کیږي او ولې وژل کیږي، د طالبانو لپاره توپير نه کوي، یواځې دا چې زیات خلک شور جوړ کړي او د حکومت حاکمیت او مدیریت تر سوال لاندې راشي.

په دې موده کې افغان امنیتي او دفاعي ځواکونه هم لاس تر زنې نه دي ناست شوي.

 همدې موده کې ۳۶۰۰ کسان د ترهګریزو کړنو په تړاو نیول شوي دي.

دا چې طالبانو په مخامخ جګړو کې ماتې منلې، اوس ماین چاودنې او چریکي بریدونه کوي او د دې بریدونو لپاره د ملکي وګړو د سپر په توګه کار اخلي.