په کاري چاپېریال کې رواني خوندیتوب

د بشري منابعو (HR) د ۱۹ مشرانو له نظره
دا مقاله د Forbes Human Resources Council له لوري وړاندې شوې، چې پکې د رواني خوندیتوب مهم مفهوم په ساده، واضح او عملي ډول تشریح شوی دی.
سريزه
په نننیو ادارو کې رواني خوندیتوب (Psychological Safety) د یو سالم، اغېزمن او بریالي کاري چاپېریال له بنسټیزو اصولو څخه شمېرل کېږي. دا هغه فضا ده چې کارکوونکي پکې کولی شي پرته له وېرې خپل نظرونه شریک کړي، پوښتنې وکړي، خپلې تېروتنې ومني او حتی نوې تجربې ترسره کړي.
خو ستونزه دا ده چې ډېری ادارې، سره له دې چې دا مفهوم مني، لا هم نه شي کولی هغه په روښانه ډول تعریف او اندازه کړي. که واضح معیارونه موجود نه وي، رواني خوندیتوب یوازې یو شعار پاتې کېږي، نه یو عملي او تطبیقي سیستم.
همدې ته په کتو، د بشري منابعو یو شمېر مشرانو خپلې تجربې شریکې کړې دي، چې دا مفهوم په عمل کې څنګه څرګندېږي.
د رواني خوندیتوب مهمې نښې
۱. د رهبرۍ نیت او کاري فضا سره همغږي وي
کله چې په اداره کې مناسب چاپېریال، تمرکز او ارامي موجوده وي، کارکوونکي ښه فعالیت کوي. که د رهبرۍ چلند له کاري فضا سره برابر وي، خلک نوښت ته هڅېږي.
۲. خلک په مهم وخت کې خپل نظر څرګندوي
رواني خوندیتوب دا نه دی چې خلک یوازې ځان آرام احساس کړي، بلکې دا دی چې د اړتیا پر وخت خپل نظر په زړورتیا بیان کړي.
۳. ستونزې پر وخت راپور کېږي
هغه ټیمونه چې ستونزې مخکې له لویېدو راپوروي او خپلې تېروتنې مني، په حقیقت کې خوندي کاري فضا لري.
۴. زده‌کړه د کمال پر ځای لومړیتوب لري
بریالي رهبران یوازې کامل کار نه غواړي، بلکې د زده‌کړې او دوامدار پرمختګ ملاتړ کوي.
۵. له ناکامۍ زده‌کړه کېږي
په سالمه اداره کې تېروتنې د ملامتۍ لامل نه ګرځي، بلکې د زده‌کړې فرصت بلل کېږي.
۶. کارکوونکي د مدیر نظر هم نقدولی شي
که کارکوونکي وکولای شي د خپل مدیر نظر په درناوي سره نقد کړي، دا د قوي باور نښه ده.
۷. رهبران د نظریاتو هرکلی کوي
رهبران باید د کارکوونکو نظرونه واوري او په مثبت او رغنده ډول ورسره چلند وکړي.
۸. رواني خوندیتوب په عمل کې څرګند وي
دا یوازې یو احساس نه دی، بلکې په دې کې ښکاري چې څوک خبرې کوي او څوک چوپ پاتې کېږي.
۹. مخالف نظر منل کېږي
که یو کارکوونکی وکولای شي خپل مخالف نظر په ازاد ډول وړاندې کړي، دا د سالم سازماني کلتور نښه ده.
۱۰. کارکوونکي ځان اورېدلی احساسوي
کارکوونکي باید دا باور ولري چې د دوی خبرې ارزښت لري او عملي اغېز لري.
۱۱. هر څوک د نوښت حق لري
په خوندي چاپېریال کې هر کارکوونکی کولی شي نوې مفکورې وړاندې کړي.
۱۲. کشر کارکوونکي هم خپل نظر بیانوي
یوازې لوړپوړي نه، بلکې ټیټ رتبه کارکوونکي هم په ډاډه زړه خبرې کوي.
۱۳. حساب ورکونه موجوده وي
رواني خوندیتوب دا نه مانا لري چې ستونزې پټې شي، بلکې دا مانا لري چې خلک خپل مسؤلیت مني.
۱۴. سالم اختلاف ته زمینه برابره وي
اداري پالیسۍ باید داسې وي چې رغنده بحث او سالم اختلاف ته ځای ورکړي.
۱۵. خلک خپل ځان په ازاد ډول څرګندوي
کارکوونکي کولی شي پرته له وېرې خپل شخصیت، نظر او احساسات څرګند کړي.
۱۶. کارکوونکي فعال ګډون کوي
که په غونډو کې د کارکوونکو ګډون زیات وي، دا د خوندي فضا نښه ده.
۱۷. مدیران خپلې تېروتنې مني
کله چې مشران خپله تېروتنه مني، نور کارکوونکي هم د صداقت جرأت پیدا کوي.
۱۸. باور او رښتینولي حاکمه وي
رواني خوندیتوب د باور، صداقت او شفافیت پر بنسټ ولاړ وي.
۱۹. ستونزې مخکې له لویېدو حل کېږي
کوچنۍ ستونزې پر وخت راپور کېږي او حل کېږي، نه دا چې وروسته جدي بحرانونه جوړ کړي.
پايله کې ويلې شو چې رواني خوندیتوب یوازې یو احساساتي مفهوم نه دی، بلکې یو عملي او مدیریتي سیستم دی چې د خلکو په چلند، خبرو او اړیکو کې څرګندېږي.
اصلي پوښتنه دا ده:
ایا کارکوونکي په ازاد ډول خپل نظر څرګندوي، که چوپ پاتې کېږي؟
که ځواب دا وي چې خلک چوپ دي، نو اداره باید په خپل کلتور، رهبرۍ او داخلي اړیکو بیا ژور فکر وکړي.
سرچينه: د فوربز د بشري سرچینو شورا