په ننګرهار او لغمان کې د ترافیکي پېښو له امله پنځه کسان مړه او ۱۱ نور ټپیان شوي دي

په ننګرهار او لغمان کې د ترافیکي پېښو له امله پنځه کسان مړه او ۱۱ نور ټپیان شوي دي.
د ننګرهار امنیتي مسؤلین وایي، نن غرمه (شنبه، د حمل ۸مه) د دې ولایت د بټي‌کوټ ولسوالۍ په «باریک‌آب» سیمه کې یو «سویفت» ډوله موټر د چلوونکي د بې‌احتیاطۍ او چټک تګ له امله له سړک څخه وتلی او له ونې سره ټکر شوی دی.
د مسؤلینو په وینا، په دې پېښه کې څلور کسان مړه شوي او یو بل سخت ټپي شوی دی.
د ننګرهار د امنیه قوماندانۍ ویاند، سید طیب حماد وایي، ټپي کس د امنیتي ځواکونو له خوا روغتون ته لېږدول شوی او ډاکترانو یې روغتیایي حالت نازک بللی دی.
په ورته وخت کې، د لغمان امنیتي مسؤلین هم وایي چې نن شاوخوا ۱۱:۰۰ بجې مخکې له غرمې د مهترلام ښار د دوهمې امنیتي حوزې اړوند «چهاردهی» سیمه کې یوه ترافیکي پېښه شوې ده، چې له امله یې یو کس مړ شوی او ۱۰ نور ټپیان شوي دي.
د لغمان د امنیه قوماندانۍ ویاند، محمد یونس یوسف‌زی وایي، دا پېښه د چلوونکو د بې‌احتیاطۍ له امله د یوه «مرسدس» موټر، ریکشا او موټرسایکل ترمنځ رامنځته شوې ده.
هغه زیاتوي چې په دې پېښه کې د موټرسایکل چلوونکی مړ شوی او ۱۰ نور کسان، چې پکې دوه ښځې او پنځه ماشومان شامل دي، ټپیان شوي دي.