له وارداتي تیارو تر ملي رڼا پورې

له وارداتي تیارو تر ملي رڼا پورې؛ ….!!!
افغانستان د برېښنا په خپلواکۍ روان دی

افغانستان د تاریخ له اوږدې او تریخې تجربې وروسته اوس هغه پړاو ته ننوځي چې ملتونه پکې یا د ځان پر پښو درېږي، او یا د نورو د رحم پر تارونو ځړېږي. برېښنا یوازې فزیکي انرژي نه ده؛ برېښنا د اقتصاد، سیاست، خپلواکۍ او ملي کرامت ستن ده. هغه ملت چې خپله رڼا له ګاونډیو اخلي، په حقیقت کې خپله اراده هم واردوي.

کلونه، حتی لسیزې، افغانستان د وارداتي برېښنا تر سیوري لاندې ژوند وکړ. زموږ فابریکې د پردیو د سویچ په حرکت چلېدې، او زموږ ښارونه د بهرنیو دولتونو د سیاسي مزاج تابع وو. کله به چې اړیکې ترینګلې شوې، زموږ ښارونه به تیارې ته ولوېدل، او زموږ صنعت به فلج شو. دا یوازې تخنیکي ستونزه نه وه؛ دا ملي اسارت و.

خو نن د تاریخ پاڼه اوړي.

اوسنی افغانستان په عملي ډول هغه تګلاره تعقیبوي چې بنسټ یې پر ځان‌بساینې ولاړ دی. د اوبو بندونه، د لمریزې او بادي برېښنا پروژې، د کورنیو شبکو پراختیا، او د ملي تولید لپاره د انرژۍ برابرول دا ښيي چې دولت نور نه غواړي د ګاونډیانو د سیاسي فشارونو یرغمل پاتې شي.

کله چې افغانستان خپله برېښنا تولیدوي، نو یوازې څراغونه نه بلکې اقتصاد روښانه کېږي. فابریکې به درېږي نه، کاري ځواک به بیکار پاتې نه شي، او افغاني توکي به د افغاني برېښنا په زور تولید شي. دا د یو واقعي ملي اقتصاد بنسټ دی، نه د مرستو اقتصاد.

په کور دننه د نوو برېښنايي پروژو پیل، د بندونو رغول، او د انرژۍ ملي شبکې پراخول، په اصل کې د یوه نوي سیاسي فکر نښې دي:
دا فکر چې وایي افغانستان باید د مصرف کوونکي له حالته ووځي او تولیدوونکی ملت شي.

د وارداتي برېښنا پرېښودل یوازې اقتصادي پرېکړه نه ده، دا ژوره سیاسي معنا لري. دا د دې اعلان دی چې افغانستان نور د نورو په خوښه نه روښانه کېږي، بلکې په خپل لاس خپل سبا جوړوي.

کله چې افغاني فابریکه د افغاني برېښنا پر مټ افغاني توکي تولید کړي، نو دا یوازې سوداګري نه ده؛ دا ملي حاکمیت دی. دا هغه مرحله ده چې ملت پکې له «مرستې اخیستونکي» څخه «ځان بسیا جوړونکي» ته اوړي.

افغانستان اوس د انرژۍ له لارې خپل سیاسي او اقتصادي استقلال بېرته تر لاسه کوي. دا بهیر که دوام وکړي، ډېر ژر به زموږ ښارونه، کورونه، فابریکې او حتی زموږ راتلونکی، د پردیو له سویچ څخه ازاد شي.

او همدا ازادي، د رښتینې واکمنۍ پیل دی.
درنښت… یارب 🤲🏻

د کاغذي امپراتورۍ زوال

زموږ انګلیسي ویبپاڼه: