د افغانستان ملي لوبډلې هیلې او د نیمه پایلوبې پړاو

د شل اوریز  کرکټ نړیوال جام په سیالیو کې له پرله‌پسې دوو ماتونو وروسته، د افغانستان ملي لوبډلې هیلې د نیمه پایلوبې پړاو ته د رسېدو لپاره له جدي ګواښ سره مخ شوې دي.
اوسمهال افغانستان د «ډي» ګروپ په درېیم ځای کې دی، چې دوه ماتې لري او د منفي منډو اوسط یې ۰.۵۵۵- دی. په همدې ګروپ کې نیوزیلنډ او سویلي افریقا له دوو لوبو څخه د څلورو نمرو په ترلاسه کولو سره په لومړي او دویم ځای کې ولاړ دي. د هر ګروپ دوه مخکښې لوبډلې بل پړاو ته لاره مومي.
سره له دې وضعیت، افغانستان لا هم په رسمي ډول له سیالیو نه دی ایستل شوی. ملي لوبډله باید خپلې پاتې دوه لوبې د متحده عربي اماراتو او کاناډا پر وړاندې په لوړې منډیزې توپیر وګټي، څو خپل منډو اوسط ښه کړي.
همداراز، افغانستان ته پکار ده چې له نیوزیلنډ یا سویلي افریقا څخه یوه لوبډله په خپلو پاتې لوبو کې درنه ماتې وخوري، څو د جدول معادلې بدلې شي.
که دا سناریو عملي شي، افغانستان کولی شي د غوره منډو اوسط پر مټ د ګروپ د دوو غوره لوبډلو په کتار کې ځای ونیسي او د غوره اته لوبډلو پړاو ته لار ومومي؛ که څه هم دا یوه سخته دنده ده، خو لا هم ناشونې نه ده.