د ولسمشر غني دا ځلي سفر به څومره ګټور وي؟

محمدروښان ښاد _

د ولسمشر غني او نورو افغان مشرانو عمده توپیر دادی چې ولسمشر غني نه د نورو غوندې شف شف کوي، نه د پاکستان د دروغو په ژمنو غلطېږي او نه هم په سیاسي او ملي مسایلو کې عاطفي او نورو مسایلو ته ارزښت ورکوي. له دې امله به د ولسمشر غني سفر پاکستان ته که ګټه ونه لري، نو تاوان او د وخت ضیاع به په هیڅ صورت نه وي.

د ولسمشر غني سفر به له دې امله هم ګټور وي، چې پاکستان په تېرو څلور نیمو کالو کې پر ولسمشر غني بېلابېل فشارونه وارد کړل، خپل مختلف مهارتونه یې وکارول، دوی بالاخره دې نتیجې ته ورسېدل چې ولسمشر غني سره له نورو هغو لارو څخه چې پر ولسمشر کرزي به یې کارول نشي بریالي کېدلی، ځکه ولسمشر غني د سیمې او نړۍ وضعیت دقیق څاري، د پاکستان وضعیت تر بل هر چا ښه ور معلوم دی، د افغانستان په اړه د پاکستان نېت، اراده او دریځ هم ښه ور معلوم دی، نو پاکستان له خپلو مهارتونو، فشارونو او بازار تېزیو نهیلی شوی او بالاخره دوی مجبوره دي چې د ولسمشر غني هغې خبرې او بلنې ته راشي چې کلونه دمخه یې ورته ویلي وو چې د هیوادونو او ملتونو اړیکې پر عواطفو نه، بلکې په دوه اړخیزو ګټو ولاړې وي او له پاکستان څخه یې غوښتي وو چې پر غیر حکومتي ډلو او ګروپونو د پانګونې او اړیکو پرځای دې له دولت سره اړیکې ونیسي.  

د ولسمشر غني دا ځلي سفر به ځکه ګټور وي چې له یوې خوا پاکستان له اقتصادي او کورني کړکېچ له پلوه په بد وضعیت کې قرار لري. له بل لوري دوی په تېرو څلور نیمو کالو کې دې نتیجې ته ورسېدل چې له ولسمشر غني سره پر هغه د فشار د زیاتولو له لارې هیڅ نتیجې ته نشي رسېدلی، نو ښه داده چې خپل مسایل ورسره د خبرو له لارې حل کړي او د افغانستان پر وړاندې د دښمنۍ اوسنی دریځ د دوستۍ دریځ ته بدل کړي.

پاکستاني مقامات اوس دا هم درک کوي چې افغانستان دا ظرفیت او توانایي لرله چې په څو کالو کې پر پاکستان خپله عمري تکیه ختمه کړي او د سیمې له هیوادونو سره سوداګریزه راکړه ورکړي، مګر پاکستان دا توانایي هم نه لري او پاکستان په اوسنیو شرایطو کې تر بل هر وخت دېته زیاته اړتیا لري چې د افغانستان له ظرفیت او موقعیت څخه معقوله او قانوني ګټه واخلي او دا ګټه هغه مهال اخیستی شي چې پاکستان له وسله والو ګروپونو او طالبانو سره خپلې اړیکې وشلوي او پرځای یې له افغان دولت سره دوستانه مناسبات ټینګ کړي.

پاکستان دا هم ګڼلې چې په زور او فشار په افغانستان کې د هند د نفوذ مخه نشي نیولی، مګر که چېرې پاکستان له افغان دولت سره دوستانه مناسبات ولري او د هند د نفوذ په اړه په ډيپلوماتیک ډول خپلې اندېښنې ورسره شریکې کړې، نو ممکن تر اوسني حالته زیات ګټور وي ، نو له همدې امله به پاکستان ته د ولسمشر غني سفر ګټور واوسي.