د کرکټ نړۍوالې شورا او ځینو نړۍوالو لوبغاړو د شاپور ځدراڼ پر مړینه خواشیني ښودلې ده
کابل (پژواک، ۱۸ چنګاښ ۱۴۰۵): د کرکټ نړۍوالې شورا، د ځینو هېوادونو کرکټ بورډونو، پخوانیو لوبغاړو او د کرکټ نړۍ ګڼو مخورو څېرو د افغانستان د پخواني چټک توپاچوونکي شاپور ځدراڼ پر مړینه خواشیني څرګنده کړې او د هغه کورنۍ، د افغانستان د کرکټ ټولنې او خلکو ته یې د ډاډګېرنې مراتب وړاندې کړي دي.
د افغانستان کرکټ بورډ (ACB) د چهارشنبې په ورځ په یوه اعلامیه کې وویل، د شاپور ځدراڼ جسد کابل ته رارسېدلی چې د ملي لوبډلې پخواني او اوسني لوبغاړي، د کرکټ بورډ چارواکي، د هغه د کورنۍ غړي او یو شمېر نور مخور کسان یې د هرکلي او احترام لپاره هوايي ډګر ته ورغلي وو.
د شاپور ځدراڼ د جنازې لمونځ نن له غرمې مخکې (پنجشنبې، د چنګاښ ۱۸مه) د کابل ښار په عیدګاه جومات کې ادا او وروسته د ځانګړو مراسمو په ترڅ کې پر مرنجان غونډۍ خاورو ته وسپارل شو.
د کرکټ نړۍوالې شورا (ICC) پر خپله اېکسپاڼه د شاپور ځدراڼ پر مړینه خواشیني څرګنده کړې او هغه یې د افغانستان له مخکښو چټکو توپاچوونکو او د کرکټ نړۍوال جام اتل بللی دی.
د کرکټ نړۍوالې شورا رییس جي شاه لیکلي چې د ۳۸ کلن پخواني افغان لوبغاړي شاپور ځدراڼ پر مړینه ډېر خواشینی شوی دی. نوموړي د افغانستان د کرکټ په نړۍوال پرمختګ کې د شاپور ونډه ستایلې او د ۲۰۱۵ کال کرکټ نړۍوال جام کې یې د سکاټلنډ پر وړاندې د هغه د اغېزناکې لوبې یادونه کړې چې افغانستان ته یې په نړۍوال جام کې لومړنۍ بریا ورپه برخه کړه.
هغه لیکلي: «زموږ ژوره خواخوږي د هغه له کورنۍ، ملګرو او د افغانستان د کرکټ له ټولنې سره ده، الله دې یې وبښي.»
دغهراز، د هند پخواني لوبغاړي یووراج سینګ ویلي چې شاپور ځدراڼ د افغانستان کرکټ یو له مخکښو بنسټګرو و او د هغه مینه او ژمنتیا به تل یادېږي.
یووراج سینګ لیکلي: «هغه وخت ډېر دردوونکی وي چې کله داسې یو څوک له لاسه ورکړو چې لوبې ته یې ډېر څه ورکړي وي. د هغه کورنۍ او د افغانستان کرکټ ټولنې ته خپله ژوره خواخوږي وړاندې کوم.»
همدارنګه د اسټرالیا چټک توپاچوونکي جاش هېزلووډ، د هند پخواني لوبغاړي او مبصر روي شاستري، د پاکستان پخواني چټک توپاچوونکي شعیب اختر او د سریلانکا پخواني الراونډر انجیلو مېتیوز هم د شاپور ځدراڼ پر مړینه خواشیني څرګنده کړې ده.
شعیب اختر شاپور ځدراڼ یو زړور توپاچوونکی بللی او ویلي یې دي چې هغه په نړۍواله کچه د افغانستان د کرکټ په مطرح کېدو کې مهم رول درلود. نوموړي د شاپور کورنۍ، ملګرو او همکارو لوبغاړو ته د تسلیت مراتب وړاندې کړي دي.
بلخوا، د بنګلهدېش کرکټ بورډ هم د شاپور ځدراڼ پر مړینه ژور خپګان څرګند کړی او ویلي یې دي چې د افغانستان د کرکټ لپاره د هغه خدمتونه به تل یادېږي.
په همدې حال کې، د کرکټ یو شمېر نورو ادارو او څېرو هم د شاپور ځدراڼ پر مړینه خواشیني څرګنده کړې او د هغه کورنۍ او د افغانستان خلکو ته یې تسلیت ویلی دی.
شاپور ځدراڼ د جولای په ۷مه د ۳۸ کلونو په عمر له اوږدې ناروغۍ تېرولو وروسته د هند په پلازمېنه نوي ډیلي کې وفات شو.
هغه تېر کال په اکټوبر کې په افغانستان کې ناروغ شو او د روان کال په جنورۍ کې د درملنې لپاره د نوي ډیلي یوه روغتون ته انتقال شو. د هغه ورور غمي ځدراڼ او د افغانستان پخواني کپتان اصغر افغان د درملنې پر مهال ورسره ملتیا کوله.
زموږ انګلیسي ویبپاڼه:
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
Comments are closed.