د ۱۴۰۵ کال کانکور ازموینه په څلورو پړاوونو کې پیلېږي

د ۱۴۰۵ کال کانکور ازموینه په څلورو پړاوونو کې پیلېږي؛ شاوخوا ۱۲۰ زره ګډونوال

د طالبانو تر ادارې لاندې د ازموینو کمېټې اعلان کړی چې د ۱۴۰۵ کال د کانکور ازموینې بهیر به د ثور میاشتې په ۲۱مه پیل شي او په ټول هېواد کې به په څلورو پړاوونو کې ترسره شي.
د دې کمېټې په وینا، سږ کال نږدې ۱۲۰ زره تنه په دې ازموینه کې ګډون کوي. د وړاندې شوو شمېرو له مخې، له ۱۱۰ زرو څخه زیات کسان به لوړو او نیمه لوړو زده کړو ته جذب شي؛ له دې ډلې څخه ۵۹ زره او ۴۶۰ تنه د عمومي ازموینې له لارې او ۲۴۰۰ د دیني مدرسو فارغان د لوړو زده کړو پروګرامونو ته شاملېږي.
دا ازموینه به په څلورو پړاوونو کې ترسره شي: لومړی پړاو د ثور په ۲۱مه په ۱۵ ولایتونو کې، دوهم پړاو د ثور په ۲۸مه په ۱۸ ولایتونو کې، درېیم پړاو د جوزا په ۱۲مه په کابل کې، او څلورم پړاو چې پکې متفرقه، له هېواده بهر داوطلبان او د شپې پروګرامونه شامل دي، د جوزا په ۲۲مه ترسره کېږي.
د ازموینو کمېټې په وینا، لومړی پړاو به په میدان وردګ، پروان، غزني، کنړ، بغلان، فاریاب، لوګر، کاپیسا، پکتیکا، هرات، سرپل، بادغیس، ارزګان، غور او بدخشان ولایتونو کې ترسره شي. دوهم پړاو به هم په پنجشېر، لغمان، بلخ، کندز، جوزجان، تخار، سمنګان، نورستان، بامیان، خوست، زابل، پکتیا، کندهار، هلمند، ننګرهار، فراه او نیمروز ولایتونو کې ترسره شي.