د ښځې تعليم د ټولنې د بقا ضمانت

په نړۍ کې هره هغه ټولنه چې د پرمختګ، سوکالۍ او ثبات خوب ويني، بايد د ښځې تعليم ته ځانګړې پاملرنه وکړي. تعليم يوازې د يو فرد شخصي بريا نه ده، بلکې د يو ملت د بقا، عزت او دوام بنسټ دی. ښځه چې د کور ستنه بلل کېږي، که په علم او پوهه سمبال وي، نو ټوله ټولنه له رڼا ډکېږي. کله چې ښځه زده کړه وکړي، د هغې فکري نړۍ پراخېږي، نظر يې روښانه کېږي او د ژوند پر وړاندې يې دريځ پياوړی کېږي.

تعليم د شعور دروازه ده. دا ښځې ته دا توان ورکوي چې خپل حقونه وپېژني، خپل مسؤليتونه درک کړي او په ټولنه کې فعاله ونډه واخلي. ناپوهه ښځه کېدای شي د دودونو او ناسم فکرونو قرباني شي، خو باعلمه ښځه د منطق، پوهې او جرئت په مټ د ظلم پر وړاندې درېږي او د سمون لار غوره کوي. کله چې ښځه پوهه شي، هغه نه يوازې خپل ژوند بدلوي، بلکې د خپل کور او چاپېريال فکري کچه هم لوړوي او د بدلون الهام ګرځي.

ښځه چې سبا مور کېږي، د راتلونکي نسل روزونکې ده. که مور باعلمه وي، نو خپل اولادونه به د ښه اخلاقو، روغ فکر او سالمې روزنې پر بنسټ وروزي. پوهه مور د ماشومانو د صحت، تعليم او نفسياتي اړتياوو په اړه ښه پوهاوی لري. هغه پوهېږي چې د ماشوم لومړنۍ زده کړه له کوره پيلېږي او د مور خبرې، چلند او فکر د ماشوم په شخصيت ژور اغېز کوي. له همدې امله، د ښځې تعليم په اصل کې د راتلونکي نسل تعليم دی او د سبا د رهبرانو روزنه ده.

تعليم ښځې ته د کار او عايد زمينه برابروي. کله چې ښځه اقتصادي خپلواکي ترلاسه کړي، نو د کورنۍ د عايد په لوړولو کې مهم رول لوبوي او د ژوند بار سپکوي. دا نه يوازې د فقر کچه راټيټوي، بلکې د ټولنې اقتصادي ثبات هم تضمينوي. باعلمه ښځه کولای شي په بېلابېلو برخو کې خدمت وکړي او د خپلې وړتيا له مخې د ټولنې د پرمختګ برخه شي. اقتصادي پياوړتيا ښځې ته اعتماد، عزت او خپلواک تصميم نيولو ځواک ورکوي.

هغه ټولنې چې ښځو ته د تعليم فرصت نه ورکوي، په حقيقت کې د خپلې ودې مخه نيسي. تعليم يافته ښځه د کورني تاوتريخوالي، ناسم دودونو او زيانمنو رواجونو پر وړاندې پوهاوی خپروي او د اصلاح لپاره کار کوي. هغه د صحت، حفظ الصحې او ټولنيز عدالت په اړه مثبت بدلون راولي. په داسې ټولنه کې چې ښځې يې باعلمه وي، د روغتيا کچه لوړېږي، اخلاقي ارزښتونه پياوړي کېږي او د همکارۍ فضا رامنځته کېږي.

اسلام هم د علم ارزښت لوړ ياد کړی دی. د قرآن مجید لومړۍ وحي د اقرأ په کلمه پيل شوه، چې د لوستلو او پوهې غوښتنه کوي. دا حکم يوازې نارينه وو ته نه، بلکې ښځو او نارينه وو دواړو ته دی.

زمونږ په تاريخ کې ډېرې باعلمه او بافضيلته ښځې تېرې شوې دي چې د علم او تقوا بېلګې وې او ټولنې ته يې ستر خدمتونه کړي دي. نو د ښځې تعليم نه يوازې عصري اړتیا ده، بلکې ديني مسؤوليت هم دی.

که مونږ غواړو چې راتلونکی نسل مو روښانه، سالم او بريالی وي، نو بايد د ښځې تعليم ته لومړيتوب ورکړو. باعلمه ښځه د کور رڼا، د ټولنې ویاړ او د ملت د بقا ضمانت ده. هغه لاس چې زانګو خوځوي، که په قلم سمبال شي، نو د تاريخ مخ بدلولای شي. راځئ چې د ښځې تعليم ته درناوی وکړو، فرصتونه برابر کړو او د يوې روښانه، باعزته او سوکاله ټولنې بنسټ کېږدو.

د مورنۍ ژبې نړیواله ورځ

زموږ انګلیسي ویبپاڼه: