ژبه په ټولنه کې” تازه چاپ شو”

“ژبه په ټولنه کې” تازه چاپ شو. په سر کې خو د کلاسبک خپرندویې ټولنه مننه کوم، چې کتاب یې خپور کړ.
ژبه په وروستیو دوو پېړیو کې د ټولنیزې موضوع په توګه مطرح شوه او ژبپوهنه د بیالوژي غوندې علومو نه ټولنپوهنې ته ورنېژدې شوه. د شلمې پېړۍ په وروستیو کې د ژبپوهنې او ټولنپوهنې بحثونه سره لا ماډرن او نېژدې شول او دې بحثونو د ژبپوهنې خپلې نظریې اغېزمنې کړې، مثلا په ژبپوهنه کې فرهنګي او موقعیتي کنټکسټونه مهم شول او چارواله ژبپوهنې هم ورته ارزښت ورکړ.
دا کتاب د ژبې په ټولنیره بڼه غږېږي، مثلا د ژبې زده کړه، بدلون، لهجې، لیکدود، املا، په پښتو ژبه د کډوالۍ اغېز، څو ژبې ټولنه او فرد، منځګړې ژبه، د ژبو تماس او پورونه، ژبنۍ رنګارنګۍ، د ملي او رسمي ژبې غوراوی، د ژبې د پرمختګ لپاره د پالیسۍ او په دې بنسټ د ژبپلانسازي جوړول او د ژبې د ټولنپوهنې په اړه د څېړنو لارې چارې.
دا پاسني ټول ټولنیز مفاهیم دي، چې ژبې ته بڼه ورکوي. موږ چې محصلان وو، د پښتو ژبې په املا به مو په غونډو، ټولګیو کې او انلاین ډول تاوه بحثونه کول، خو په دې نه پوهېدو، چې ژبه څنګه او ولې ملي یا رسمي کېږي؟ املا او لیکدود یې ولې او څنګه بدلېږي؟ او داسې ګڼې پوښتنې وې، چې موږ ورته سیستماتیک ځوابونه نه لرل.
په دې کتاب کې د دې او داسې ګڼو اړوندو پوښتنو د ځوابولو هڅه شوې ده. خدای دې وکړي، چې په لوستو یې د وخت د ضایع کېدو احساس و نه کړئ.