له ډوډۍ وروسته د معدې درد؛ عادي ستونزه که د خطر زنګ؟

که هر ځل له ډوډۍ خوړلو وروسته د معدې درد احساسوئ، نو دا یوازې د ډېر خوراک پایله نه ده. دا کېدای شي ستاسو د هاضمې سیستم د یوې پټې ستونزې نښه وي. د درد اصلي لامل پېژندل، د سمې درملنې لومړی ګام دی.

■ له خوړو وروسته د معدې درد تر ټولو عام لاملونه
● بده هاضمه (Indigestion): تر ټولو عام لامل دی. ډېر خوراک، په بیړه خوراک او غوړ یا مساله لرونکي خواړه د معدې درد او ناارامي پیدا کوي.
● د خوړو حساسیت: که له ځانګړو خوړو وروسته د معدې درد، کانګې یا نس ناسته پیدا کېږي، ښايي بدن مو له هماغه خوړو سره حساسیت ولري.
● د معدې تېزاب بېرته مرۍ ته راتلل (GERD): که د معدې درد ترڅنګ د سینې سوخت، په خوله کې تروش خوند یا د شپې ټوخی هم لرئ، ممکن د معدې تېزاب بېرته مرۍ ته راګرځي.
● د معدې زخم: د معدې زخم هم د خوړو وروسته درد پیدا کولی شي، په ځانګړي ډول که درملنه یې ونه شي.
● د صفرا تیږې: د غوړو خوړو له خوړلو وروسته د نس د ښي اړخ شدید درد د صفرا د تیږو مهمه نښه ده.

■ څنګه یې مخه ونیسو؟
✓ خواړه ورو ورو او ښه وژوئ.
✓ له ډېر خوراک څخه ډډه وکړئ.
✓ غوړ، مساله لرونکي او ډېر تروش خواړه کم کړئ.
✓ له خوړو وروسته لږ تر لږه ۱۵–۲۰ دقیقې مزل وکړئ.
✓ له خوړو وروسته سمدستي مه ویده کېږئ.
✓ کافي اوبه وڅښئ، خو د خوړو پر مهال یې ډېر استعمال مه کوئ.

کله ډاکټر ته مراجعه وکړئ؟
که هره ورځ له خوړو وروسته درد لرئ.
که درد ډېر شدید وي یا دوام وکړي.
که په کانګو یا غایطه کې وینه وي.
که بې دلیله وزن کمېږي.
که له درد سره تبه، دوامداره کانګې یا د خوړو په تېرولو کې ستونزه ولرئ.

■ کورنۍ نسخه
● د زېرې اوبه: یو کوچنی کاشوغی زېره په یوه پیاله اوبو کې ۵ دقیقې وایشوئ، صاف یې کړئ او له خوړو ۳۰ دقیقې وروسته یې وڅښئ.
● د ادرک چای: د ادرک یوه کوچنۍ ټوټه په یوه پیاله اوبو کې ۵–۱۰ دقیقې وایشوئ او له خوړو وروسته یې وڅښئ.
● ساده مستې: نیمه پیاله ساده مستې له غرمې یا ماښام وروسته وخورئ؛ دا د هاضمې په ښه کولو کې مرسته کوي.
● پودینه: د پودینې د پاڼو چای د معدې ګاز، پړسوب او ناارامي کموي.
مهمه یادونه: که د معدې درد په دوامداره توګه تکرارېږي، یوازې په کورنیو نسخو تکیه مه کوئ. د دقیق تشخیص او مناسبې درملنې لپاره د ډاکټر معاینه اړینه ده.