په ماشومانو کې د بروفین او پاراسټامول استعمال

بروفین (Ibuprofen) او پاراسټامول (Paracetamol) هغه درمل دي چې په ماشومانو کې د تبې او درد د کمولو لپاره کارول کېږي. دواړه اغېزمن درمل دي، خو باید په سمه اندازه او د ماشوم د وزن مطابق استعمال شي.

د وزن مطابق استعمال

د بروفین او پاراسټامول دوز د ماشوم د وزن له مخې ټاکل کېږي، نه یوازې د عمر له مخې.

بېلګه:
که یو ماشوم ۱۰ کیلوګرامه وزن ولري او بل ۲۰ کیلوګرامه، د دواړو د درملو اندازه به یو شان نه وي. د وزن په زیاتېدو سره د درملو اندازه هم بدلېږي. له همدې امله باید د هر درمل له استعمال مخکې د ماشوم وزن معلوم وي.

دوامداره استعمال څه معنی لري؟

دوامداره (Continuous or Prolonged Use) یعنې یو درمل په پرله‌پسې ډول او د اوږدې مودې لپاره کارول.

د بروفین په اړه، که ماشوم ته:

– هره ورځ څو ورځې یا څو اوونۍ پرله‌پسې ورکړل شي.
– یا د اړتیا پرته په مکرر ډول استعمال شي.

نو دې ته دوامداره استعمال ویل کېږي.

بېلګه:
که ماشوم ته د تبې لپاره ۱ یا ۲ ورځې بروفین ورکړل شي، دا عادي استعمال دی. خو که هره ورځ د ۱۰، ۱۵ یا ۲۰ ورځو لپاره بروفین ورکول کېږي، دا دوامداره استعمال ګڼل کېږي او د جانبي عوارضو خطر زیاتوي.

د بروفین جانبي عوارض

بروفین ځینې جانبي عوارض لرلای شي، لکه:

– د معدې درد
– زړه بدوالی او کانګې
– د معدې زخم او وینه بهېدنه (په ډېر یا ناسم استعمال کې)
– د پښتورګو ستونزې
– حساسیتي غبرګونونه

د پاراسټامول جانبي عوارض

پاراسټامول عموماً خوندي درمل ګڼل کېږي، خو:

– د ډېر دوز په صورت کې د ځیګر جدي زیان رامنځته کولی شي.
– زړه بدوالی او حساسیتي غبرګونونه هم کله ناکله لیدل کېږي.

کوم یو لږ جانبي عوارض لري او ولې؟

په عمومي ډول، پاراسټامول د بروفین په پرتله لږ جانبي عوارض لري.

بروفین د NSAIDs (غیر سټیرویډي التهاب ضد درملو) ډلې پورې اړه لري. دا درمل کولی شي د معدې محافظتي طبقه اغېزمنه کړي، له همدې امله د معدې درد، د معدې زخم او حتی د وینې بهېدنې خطر زیاتوي. همدارنګه په ځینو حالاتو کې، په ځانګړي ډول د اوږدمهاله استعمال یا د بدن د اوبو د کمښت پر مهال، پر پښتورګو هم اغېزه کولی شي.

پاراسټامول د معدې پر طبقه او پښتورګو نسبتاً لږ اغېزه لري، نو د عادي استعمال پر مهال د معدې او پښتورګو اړوند عوارض یې عموماً کم وي. له همدې امله د ماشومانو د عادي تبې لپاره ډېر وخت د لومړي انتخاب درمل ګڼل کېږي.

خو دا معنی نه لري چې پاراسټامول بې‌خطره دی. که له ټاکلي دوز څخه زیات استعمال شي، په ځانګړي ډول د ځیګر (Liver) لپاره ډېر خطرناک کېدای شي او جدي زیان رسولی شي.