حکومت ويده دی؛ د زابل پر پنځمه ولسوالي هم داعشيان ور وختل

سرخط ته د رسېدلو مالوماتو له مخې، داعش په زابل کې تر اوسه جګړه نه کوي، بلکې دفاعي حالت يې اختیار کړی، که کله ورباندې بريد کېږي، دفاع کوي، خو که بريد ورباندې و نه‌شي، يوازې ځانونه چمتو کوي.
په زابل کې تر ډېرې اندازې پورې داعشيان نورو سيمو ته د جګړې له‌پاره اورپکي روزي. دوی زابل د يوه دمه‌ځای په توګه کاروي او له پاکستانه راغلي ترهګر په همدې ولايت کې تر روزلو وروسته په وسلو باروي او نورو ولايتونو ته يې لېږي.
هلته مېشت داعشي وسله‌وال چې له ډېرو مالي امکاناتو، وسلو او جنګي وسایلو برخمن دي، له پاکستانه تازه را اوښتي جګړه‌مار همدلته تنظیموي، نورو ولایتونو ته يې استوي او د دې ترڅنګ د جلب و جذب په برخه کې زیات فعالیتونه لري.

د زابل د ولايتي شورا ريیس عطا جان حق‌بیان چې په دې برخه کې يې ښکاره شواهد موندلي وايي، هلته مېشت داعشيان له خپلو روزنیزو مرکزونو وسله‌وال د دایچوپان له لارې دایکندي او نورو شمالي ولایتونو ته انتقالوي او د دې تر څنګ يې د روزګان له لارې نورو جنوبي ولایتونو ته لېږي.
د ده په وینا، په ټولیزه توګه داعشیان له پاکستان څخه د شملزو ولسوالي د سره ځنګل له لارې زابل ته داخلېږې، هغه کرښه چې ۳۰ کيلو مټره اوږده پرته ده او هیڅ امنيتي تدابیر ورته نه‌شته.

سرخط ته رسېدلي مالومات ښيي چې اته میاشتې وړاندې د زابل په دريو ولسواليو کې ۷۰۰ داعشي کورنيو چې ښځې او ماشومان هم ورسره وو، حضور درلود، خو اوس يې تر نیمايي زیاتې شمالي ولایتونو او روزګان ته لېږدېدلې دي.
د زابل د ولايتي شورا استازي د خلکو له خولې وايي چې داعشیانو له خلکو کورونه په لوړه کرایه نيولي، بیا يې خپلې نظامي قرارګاوې او روزنیز مرکزونه پکې جوړ کړي.
د سرچینو د مالوماتو له مخې راغلي وسله‌وال زیات په عربي، اردو او روسي ژبو خبرې کوي، خو مرستندویان او لارښوونکي يې د سیمې اوسېدونکي نيولي دي، ځکه زیاتې پيسې او امتیازات ورکوي.

د زابل د ولايتي شورا منشي اسدالله کاکړ وايي چې اوس داعش ته د زابل د غریبو ځوانانو تګ زیات شوی، ان د ختیځ ولایت ننګرهار په یو شمېر ولسواليو کې جنګېدونکې داعشیان له زابله تللي دي.
کاکړ زیاتوي چې په ډېرو ولسواليو کې د امنيتي سرتېريو د کمو تشکیلاتو له امله یوازې د ولسواليو مرکزونه د وسله‌والو په کنټرول کې دي، پر نورو سيمو يې د داعشيانو بيرغونه رپېږي.

سرخط ورځپاڼه