کابل پر بې اوبو ښار بدلېږي

د افغانستان پلازمېنه کابل چې شااخوا شپږ مېلیونه اوسېدونکي لري، د اقلیمي بدلون د اغېزو له امله ښايي تر ۲۰۳۰ کال پر بې اوبو ښار بدل شي.

نیویارک ټایمز په خپل یوه راپور کې ویلي چې کابل ښار کې د اوبو د کمښت ستونزه تر بل هر وخت ډېره شوې او د دې چارې لامل د ورښتونو کمښت، د ځمکې لاندې اوبو زېرمو وچېدل او د ژورو څاه ګانو کیندل بلل شوي.

د نیویارک ټایمز په راپور کې ویل شوي چې د کابل ښار ډېری وګړي د څښاک پاکو اوبو لپاره څو کېلو متره پلی مزل کوي او حتی د څښاک پاکو اوبو لپاره د جوماتونو له اوبو استفاده کوي.

دې راپور کې اندېښنه څرګنده شوې که په کابل ښار کې د ځمکې لاندې اوبو ستونزه هواره نه شي ښايي په ۲۰۳۰ زېږدیز کال کې کابل د نړۍ لومړۍ بې اوبو پلازمېنه شي.

نیویارک ټایمز کاږي، کابل ښار کې د تېرو ۲۵ کلونو په پرتله شپږ برابره نفوس زیات شوی او د څښاک پاکو اوبو ته لاسرسی تر دې کچې سخت شوی چې ان وګړي یې د اوبو پر سر یو بل سره لفظي او فزیکي شخړې کوي.

د کابل ښاریان بیا نیوکه کوي چې واک ته د طالبانو له رسېدو وروسته په دې ښار کې د څښاک پاکو اوبو ستونزه زیاته شوې او طالبان نه دي توانېدلي چې د دې ستونزې د حل لپاره د نږدې بندونو او سیندونو اوبه کابل ښار ته ولېږدوي.

په همدې حال ملګرو ملتونو هم په کابل ښار کې د ځمکې لاندې اوبو پر کمښت اندېښنه ښودلې او زیاتوي، که دې ستونزې ته رسېدنه ونه شي ښايي تر ۲۰۳۰ کال کابل بې اوبو ښار شي.

ملګري ملتونه وايي، د کابل یو پر درېیمه خلک د څښاک پاکو اوبو ته لاسرسی نه لري او هر کال د اقلیمي بدلون له امله لږ تر لږه ۷۰۰ زره افغانان له خپلو اصلي مېنو بې ځایه کېږي.
د یادونې ده چې د طالبانو حکومت څو ځلې ژمنه کړې چې کابل کې د اوبو کمښت ستونزې د حل لپاره پلان لري د پنجشېر سیند اوبه دې ښار ته واړوي؛ خو خلک نیوکه کوي چې د طالبانو حکومت په ډېرو برخو کې د عمل پرځای یوازې پر ژمنو تمرکز کوي.

ABN