ولې ځینې د کولمو ناروغان له اسهال څخه شکایت کوي؟

یوه نوې څېړنه ښيي چې په کولمو کې موندل کېدونکی یو هورمون که چېرته په لوړ کچه موجود وي، نو کولی شي د مزمن اسهال د ډېرو پېښو سبب شي. دا موندنې ښيي چې ښايي د هغو ناروغانو تر ۴۰٪ پورې پېښې چې د عصبي کولمو له سنډروم (IBS) سره اسهال لري، له همدې امله وي. دغه څېړنه کولی شي د وینې ازموینې او نوو درملو د پراختیا زمینه برابره کړي.

دا څېړنه د بریتانیا د کمبریج پوهنتون ساینسپوهانو کړې او پایلې یې د Gut په نوم په طبي مجله کې د جولای ۲۳مه خپرې شوې دي. د EurekAlert ویبپاڼې هم پرې راپور ورکړی.

کله چې موږ خواړه خورو، نو کبد صفراوي تیزاب خوشې کوي ترڅو غوړي تجزیه او بدن ته جذب شي. دا تیزاب د وړو کولمو په پورته برخه کې خوشې کېږي او بیا د کولمو له وروستۍ برخې جذبېږي.

تقریباً له هر ۱۰۰ کسانو یو له داسې حالت سره مخ وي چې “د صفراوي تیزاب اسهال” یا “د صفراوي تیزاب خراب جذب” نومېږي، چې پکې صفرا په سمه توګه جذبېږي نه، او مستقیم غټو کولمو ته رسېږي، هلته بیا اوبي، بې‌اختیاره اسهال رامنځته کوي.

دا حالت تشخیص کول ګران دي، ځکه چې اوس مهال کوم معیاري وینه‌یي ازموینه نشته. ډېری کسان یوازې د عصبي کولمو په سنډروم (IBS) اخته ګڼل کېږي، چې دا یو عمومي اصطلاح ده د هضمي سیسټم د بېلابېلو اختلالاتو لپاره.

اندازه ده چې له هر ۲۰ کسانو یو د IBS له سنډروم سره مخ وي، او له هغو ناروغانو چې اسهال یې اصلي نښه ده، تقریباً یو له درېیو سره ښايي د صفراوي اسهال تشخیص نه وي شوی.

د انسولین ته ورته پیپټایډ ۵ (INSL5) رول

مخکېنیو څېړنو چې په موږکانو ترسره شوي، ښودلې چې یو کولموی هورمون Insulin-Like Peptide 5 (INSL5)—چې د غټو کولمو او مستقيمې کولمو په پای کې موندل کېږي—شاید د مزمن اسهال سبب وي. دا حجرې هغه وخت INSL5 خوشې کوي کله چې د صفراوي تیزاب له لوري تحرک شي.

څېړونکو دا وڅېړل چې ایا دا هورمون کولی شي په انسانانو کې هم د مزمن اسهال لامل وي. دا تحلیل د یوه نوي انتی باډي ازموینې له لارې ممکن شو، چې د Eli Lilly درمل جوړونکي شرکت له خوا چمتو شوې وه، او کولای شي د INSL5 ډېرې کمې کچې هم اندازه کړي.

په یوه بله ازموینه کې چې د آډیلیډ پوهنتون (استرالیا) ترسره کړې وه، رضاکارانو ته د صفراوي تیزاب شرجي پیچه ورکړل شوه، چې د GLP-1 هورمون (د وزن کمونې درمل پرې متکي دي) خوشې کېدو ته یې لاره هواره کړه. خو دا پیچه یوه ناوړه پایله هم لرله، چې هغه اسهال و.

کله چې د کمبریج ډلې د هغې مطالعې نمونې وڅېړلې، نو وموندل یې چې د صفراوی تیزاب پیچه د INSL5 کچه لوړه کړې وه. هرڅومره چې دا هورمون زیات و، هغومره چټکه اړتیا وه چې رضاکار تشناب ته لاړ شي.

دا پایلې دا ښيي چې INSL5 هورمون د مزمن اسهال په رامنځته کولو کې رول لري. د هغو ناروغانو په نمونه‌وو کې چې د صفراوي اسهال له ستونزې سره مخ ول، INSL5 ډېر لوړ و، پداسې حال کې چې دا هورمون په روغو کسانو کې نشت یا ډېر کم و. برسېره پر دې، هرچومره چې د INSL5 کچه لوړه وه، هغومره د دوی فاضله مواد نرم یا مایع ول.

ډاکټر کریس بانون، د کمبریج پوهنتون څېړونکی او د مطالعې شریک لیکوال وایي:

“دا یوه ډېر هیښوونکې پایله وه، ځکه چې موږ ته یې دا وښوده چې دا هورمون کولی شي د دې ناسموالیو اصلي لامل وي. دا مانا هم لري چې ښايي موږ وکولای شو د دې هورمون پر بنسټ د وینې یو ازموینه جوړه کړو، ترڅو د صفراوي اسهال تشخیص اسان شي، که چیرې دا هورمون یوازې په اغېزمنو ناروغانو کې لوړ وي.”

د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه

DNB Bank AC # 0530 2294668 :د دعوت بانکي پته 
 NO15 0530 2294 668: له ناروې بهر د نړیوالو تادیاتو حساب
Vipps: #557320 : د ویپس شمېره 

  Donate Here