ګرانه ملګرېه

یو ګل چې څومره ډېر رنګونه ولري ښکلا یې هم هومره زیاته وي او چې څومره مخونه ولري هغومره دستاینې وړ وي،خو یو انسان که دوه رنګه شو یا یې ځان دوه مخی وښوده نو نور یې مخ دکتو نه وي.
پو هان وایي: څنګه چې یې، هغسې ځان ښیه او څنګه چې ځان ښیې هغسې اوسه.
خو ځيني انسانان شته چې نه يوازې څورنګه،څوبڼې او څو مخونه لري، بالکې ورسره څو ژبې یې هم په خوله وي. او دماهرو ایکټرانو په څېر دخپل هر رنګ او هر مخ دښودلو لپاره مخصوصې صحنې لټوي او دخپلې هرې ژبې لپاره ځانته موقع ګوري.
دانسې انسانان دنورو په رنګ رنګېدل نه غواړي، خو دځان درنګ په بدلولو کې دومره ما هر وي چې نور په خپل رنګ ژر غولالی شي. دمخونو په پېژندلو کې لاس لري،خو ددوی دمخ بڼه پېژندل دمصنوعي سپوږمۍ په اصلي ماهيت پوهېدلو غوندې وي.دوی په خپله ژبه پسې نه ګرځې،خو خپله ژبه دهر چا او هر ځای داقتضا سره ګرځوي. دوی د هر مجلس درنګ سره خپل رنګ بدلولی شي او دهر چا دخوب رګ یې ځانته معلوم کړی وي. دوی په همدغه یوه ژبه غله ته وايي غلا کوه او دکور خاوند ته وايي: کور ساته.
ظالم ته دظلم لاره ښیي او مظلوم ته دانتقام اخيستلو سترګګونه وهي.
حاکم ته محکومین وي او محکومینو ته دحاکمانو په رنګ کې وړاندې کېږي. او که ورته ځیر شو همدا دوه مخي ،دوه رنګي کسان دي چې دټولنې دطبقاتو تر منځ ددې پر عوض چې وحدت ،یووالی او ښه نيت پیدا کړي ،دهغوی په منځ کې دبدبینۍ ،بد ګمانۍ او بدنینۍ تورې پردې اچوي ،که دحاکمې او محکومې طبقې ترمنځ واقع شي ،دواړو خواوو ته داسې څرګندوي چې همدا دوی دي چې ددې دوو طبقو تر منځ یې آرامي ساتلې ده،که دوی نه وي دهغوی آرامي به هم ویجاړه شي.حال دا چې که دا دوه مخي او دوه رنګي له منځه لرې شي. دطبقاتو ترمنځ مستقیمه رابطه او مفاهمه ډېر ددوی منځ ته صميميت او یو رنګي راوستلای شي.
نو ګرانه ملګريه!
که غواړو چې دښه او نیکمرغه ژوند سره مخا مخ شو لازمه ده چې ددې دوه رنګي، دوه مخي او دوو ژبوڅخه لومړی ځانونه وژغورو او بیا یې په ټینګه مخنيوي لپاره زیار وباسو هر چا ته او په هر مجلس کې چې څنګه یوو هغسې ځانونه وښایو او چې څنګه ځانونه ښایوو هغې واوسو.او دا مو ډاډ وي چې یوه ورځ نه یوه ورځ به ضرور ددوو مخو، مخونه توراو دوه رنګو رنګونه ورک او دوه ژبو ژبې وچې شي. ځکه چې کوږبار تر منزله نه رسېږي
او دوې هندواڼې په یوه لاس کې اخيستلای نه شې.
پای