د پاکستان ډورن الوتکو خوست او ننګرهار بمبار کړی

سرچینې وايي چې د ننګرهار په مومندره او غني خېلو او د خوست په سپېره ولسوالۍ کې د پاکستان بې پیلوټه الوتکو بمبار کړی.

د سرچینو په خبره، خوست کې د بمبار له امله دوه ماشومان وژل شوي او شپږ کسان ټپیان دي، ننګرهار کې هم ځايي طالب چارواکي د دوو ماشومانو د ټپي کېدو او څو نورو د ورکېدو خبره کوي.

په خوست کې سرچینې وايي، بې پیلوټه الوتکو د سپېرې ولسوالۍ په افغان دوبۍ سیمه کې ګزمې کولې چې د حافظ ګلبهادر ډلې وسلوالو پرې ډزې وکړې.

سرچینې وايي له ډزو وروسته الوتکو سورکاخ کلی یو کور بمبار کړ چې له امله یې دوه ماشومان ووژل او شپږ کسان ټپیان شول.

سورکاخ کلی، افغان دوبۍ او ور څېرمه سیمو کې له وزیرستان کډه شوي خلک اوسېږي او پاکستان وايي چې په دې خلکو کې د ټي ټي پي غړي هم دي.

د پاکستان ډرون د غني خېلو په ۲۸ او د مومندرې په ۲۹ ویاله کې هم دوه بریدونه کړي.

یو طالب چارواکی وټسپ پیغام کې وايي چې ۲۸ ویاله کې د شاهسوار په نوم د یو کس پر کور برید شوی او د کلي ملک وايي چې دې برید کې دوه ماشومان ټپیان دي او څه ماشومان ورک دی.

پاکستان د تېر کال په مارچ کې هم د خوست پر سپېره ولسوالۍ سربېره د پکتیکا په برمل او کونړ کې هم بمبار کړی و، چې له امله یې لسګونه کسانو ته مرګ ژوبله اوښتې وه.

هغه مهال پاکستان ویل چې وسلوال یې په نښه کړي، خو د طالبانو پر حکومت سربېره یوناما هم وویل چې ولسي وګړي وژل شوي دي.
ABN