د ماشومانو احساسات

د ماشومانو د احساساتو درک ډېره مهمه او اساسي موضوع ده، چې د والدینو، ښوونکو او د ماشومانو پالونکو او روزونکو ته باید اهمیت ولري. د ماشوم احساسات د هغوی د شخصیت، چلند او ټولنیز پرمختګ بنسټ جوړوي. روانپوهان وایی، ځینې مهم ټکي دي چې د ماشومانو د احساساتو د درک کولو لپاره باید په پام کې ونیول شي:

احساسات بابیزه مه ګڼئ

ماشومان که خوشحاله وي، خپه وي، وېرېدلي وي یا غوسه وي، دا ټول احساسات ریښتیني دي. باید هغوی ته ووایو چې دا احساسات طبیعي دي او هر څوک یې لري. کله چې ماشوم خپه وي، مسخرې پرې مه کوئ او ارزښت ورکړئ.

ماشوم ته غوږ ونیسئ

ماشوم ته وخت ورکړئ چې خپلې خبرې او احساسات بیان کړي. که ماشوم وویل: “زه وېرېږم”، هڅه مه کوئ چې سمدلاسه دا احساس له منځه یوسئ. لومړی یې ومنئ، بیا پوښتنه وکړئ چې ولې وېرېږي او څنګه ورسره مرسته کولی شئ.

احساسات ته نوم ورکړئ

ماشومان ډېر وخت نه پوهېږي چې څه ډول احساس لري. مرسته ورسره وکړئ چې خپل احساسات وپېژني. مثلاً، ووايئ:
– زه فکر کوم ته غوسه یې ځکه چې…
– ته خفه ښکاري، څه پېښه شوې ده؟

د مثال له لارې

که چېرې مور یا پلار خپل احساسات په مناسب ډول بیان کړي، ماشوم هم دا زده کوي. مثلاً، که پلار ووايي: “زه نن ستړی یم، لږ ارام ته اړتیا لرم”
ماشوم دا زده کوي چې احساسات باید بیان شي، نه چې پټ شي.

غبرګون

ماشوم ته وښایاست چې غوسه، ویره یا خپګان څنګه په ښه ډول کنټرول شي. مثلاً، کله چې ماشوم غوسه شي، ورته ووايئ چې ژوره ساه واخلي، یو ځای ته لاړ شي، یا رسم وکاږي یا سپورټ وکړي تر څو ارامه شي.

ماشوم ته د امن احساس ورکړئ

ماشومان هغه وخت خپلې احساسات څرګندوي، چې ځان خوندي احساس کړي. هغوی باید پوه شي چې د هر ډول احساس په صورت کې مور او پلار ورسره دي او هغوی نه پرېږدي.
نو:
د ماشوم احساسات نه یوازې د رواني روغتیا لپاره مهم دي، بلکې د هغوی پر شخصیت اغېزه هم لري. که موږ وغواړو چې زموږ ماشومان بااعتماده، عاقل او د نورو احساساتو ته درناوی لرونکي لوی شي، باید له وړوکوالي څخه یې احساسات ومنو، درک کړو او ښه چلند ورسره وکړو.