د واده لپاره د ښځې او خاوند تر منځ باید څو کاله عمر توپیر وي؟

په معمولي ډول په افغانۍ ټولنه کې د واده لپاره د نجلۍ او هلک ترمنځ د عمر واټن ته ډېر پاملرنه نه کوي، د عمر واټن ورته عادي ښکاري او فکر کوي چې هېڅ ستونزه نه لري.

کله کله کونډه ښځه چې عمر یې له دېرش کلونو پورته وي اتلس يا شل کلن هلک ته نکاح کړي او بیا کله کله يوه وړه نجلۍ چې عمر یې د ۱۵ نه تر ۲۰ کلونو په منځ کې وي يوه ۴۰ کلن سړي ته نکاح کړي. که څه هم دا خبره هغومره معمول نه ده او اوس مهال ډېری افغان کورنۍ دغه ټکي ته پام کوي، خو بیا هم دا کړنه په بشپړه توګه له منځه نه ده تللې او لا هم ځينې خلک په واده کولو کې د عمر واټن ته پاملرنه نه کوي.

په واده کولو کې د عمر ډېر واټن تر واده وروسته په ګډ ژوند کې ډېرې ستونزې رامنځته کولای شي او ان کله کله د طلاق لامل کېږي، په دې لیکنه کې غواړو تاسو ته د يوې جوړې د عمر د مناسب واټن په هکله معلومات درکړو، دا چې د واده لپاره د ښځې او خاوند تر منځ باید څو کاله عمر توپیر وي؟

څېړنو ښودلې چې د ښځې او خاوند ترمنځ عمر باید لږ تر لږه ۸ کاله واټن وي. مطلب خاوند باید له خپلې ښځې ۸ کاله مشر وي.

اسټراليايي څېړونکي دې پایلې ته رسېدلي چې خاوند باید له خپلې ښځې څخه ۸ کاله مشر وي. د اسټراليا پوهنتون څېړونکو په ۲۵۰۰ اسټرالیايي خوشاله او ناخوښه جوړو له ۲۰۰۱ نه تر ۲۰۰۷ پورې د شپږو کلونو په ترڅ کې د مېرمنو او د هغوی له مېړنو سره د هغوی د اړيکو په څرنګوالي څېړنې ترسره کړې دي.

په دې څېړنه کې يو مهم ټکی د مېرمنو او د هغوی د مېړنو ترمنځ د عمر واټن دی. ځکه د عمر واټن په ګډ ژوند کې ځانګړی ارزښت لري. د دغو څېړنو پایلو ښودلې ده چې د ښځو لپاره به غوره وي چې له هغو نارينه وو سره واده وکړي چې ۸ کاله ترې لوی وي. که په واده کې دغه ټکي ته پاملرنه وشي، تر واده وروسته به خوشاله ګډ ژوند ولري.

– هغه نارينه چې له خپلې مېرمنې نه یې عمر ډېر لوړ او يا ډېر ټيټ وي له خپل ګډ ژوند څخه خوشاله نه وي او په دوامداره بڼه د بلې اړيکې د جوړلو په هڅه کې وي.

په پای کې غواړم دې ټکي ته هم اشاره وکړم چې که د ښځې او خاوند عمرونه برابر وي دا ډول ګډ ژوند هم له خوښۍ او هوساينې ډک وي، ځکه هغه وخت چې د مېرمنې او خاوند عمر برابر وي له يو بل سره د ارامتیا احساس کوي او د هغوی ترمنځ به د عمر په اړه هېڅ ډول جنجال رامنځته نه شي.