د پاکستان جمهوري غوښتونکي غورځنګ « پي ډي اېم» مشر مولانا فضل الرحمان وايي، پاکستانی پوځ د قبایلي سیمو په نا امنیو کې په خپله لاس لري او له یاد پوځ یې وغوښتل، څو په قبایلي سیمو کې خپل پوځي حضور ته د پای ټکې کیږدي.
نوموړي تېره په بنو کې خپلو زرګونه پلویانو ته په وینا کې وویل، چې د پاکستان حکومت دومره کمزوری شوې چې په خبره یې اوس دې هېواد کې د نا امینو له کبله ټول هېوادوال په ویر کې ناست دي. هغه وویل:« آیا په قبایلو کې امن شته، ترهګري شته او که نه، بې ګناه خلک وژل کېږي که نه، نو بیا پوځ د څه لپاره هلته پروت دی، ترهګري خو ځکه نه ختمیږي، چی پوځ ته هلته د پاتې کېدو بهانه جوړوي، بلوچستان کی پوځ پروت دی، وايي دغلته امنیت ستونزه ده، موږ غوښتنه کړو چی له قبایلي سیمو او بلوچستان څخه پوځ بیرته خپلو بیرکونو ته بوزي.»
د پي ډي اېم مشر دا څرګندونې داسې مهال دي چې په ۲۰۲۰ز کال کې هم په ټولو قبایلي سیمو او په ځانګړي ډول په شمالي وزیرستان کې لسګونه هدفي بریدونه، چاودنې او له امنیتي ځواکونو سره د وسلو والو نښتې شوي او په ترڅ کې یې سلګونه کسانو ته مرګ ژوبله اوښتې ده.
د بنو دې غونډه کې د پښتونخوا ملي عوامي ګوند مشر محمود خان اڅکزی هم ګډونوال وو چې نوهغه هم د پاکستان پوځ د قبایلو په نا امنه کولو کې ښکېل وباله او زیاته یې کړه چې د پاکستان پوځ هېڅ ډول ډيموکراسۍ ته ژمن ندی. نوموړي وویل: « پاکستان یو ناکام حکومت دی، ټول ملک کې نا قراري روانه ده خلک وږي دي روزګار نشته، بهرني پورونه اوج ته رسیدلي نو ښه به دا وي چې حکومت دې قرار خپلو کورونو کې کیني.»
نوموړي دغه راز زیاته کړه، له څلویښتو کلونو د پښتنو وینې تویېږي او په خبره یې چې نور به هېچا ته هم اجازه ورنکړي، چې د پښتنو وینې توی کړي.
دا په داسې حال کې ده، چې دې وروستیو کې د پاکستان په قبایلي سیمو کې تر بل هر وخت د ترهګرۍ پېښې ډېرې شوي او د حکومت مخالف ګوندونه پاکستانی پوځ دې نا امنیو کې په لاس لرلو تورنوي.