له جرمني څخه ۳۰ افغان کډوال جبري ويستل شوي

د جرمني رسنیو راپور ورکړی چې ۳۰ افغان کډوال د یوه چارټر الوتنې له لارې د لایپزیګ له هوايي ډګر څخه کابل ته ایستل شوي دي.
د «بیلد» ورځپاڼې د راپور له مخې، دغه کډوال نن سهار، سه‌شنبه د سنبلې په ۳مه، په جبري ډول افغانستان ته استول شوي دي.
راپور زیاتوي چې په دې الوتنه کې یو شمېر هغه افغان کډوال هم شامل وو چې جنايي سابقه نه لري؛ خو بیا هم په جبري توګه له جرمني څخه ایستل شوي دي.
د کډوالو د لېږدونکې الوتکې له پورته کېدو مخکې، د کډوالو د حقونو یو شمېر فعالانو د لایپزیګ په هوايي ډګر کې اعتراضي غونډه وکړه.
په خپرو شویو ویډیوګانو کې لیدل کېږي چې اعتراض کوونکي «د اخراج پر وړاندې نه، کډوالو ته ښه راغلاست» شعارونه ورکوي.
اعتراض کوونکو د جرمني د حکومت هغه سیاست غندلی چې له مخې یې د طالبانو تر واک لاندې افغانستان ته کډوال په جبري ډول ستنول کېږي او د دغه بهیر د درولو غوښتنه یې کړې ده.
د جرمني حکومت له طالبانو سره د ډیپلوماتیکو اړیکو له ټینګولو او د دې ډلې د دوو ډیپلوماتانو له منلو وروسته، افغانستان ته د کډوالو د اخراج لړۍ زیاته کړې ده.
په پیل کې ټاکل شوې وه چې یوازې هغه کډوال افغانستان ته واړول شي چې د جنسي تېري، وژنې، د ملي امنیت د ګواښ او نشه‌يي توکو اړوندو جرمونو په څېر درنو جرمونو له امله محکوم شوي وي؛ خو برلین په دې وروستیو کې پرېکړه کړې چې له جنايي سابقې پرته کډوال هم افغانستان ته واستوي.