د ناقانونه کډوالۍ تراژیدي؛ په نیمروز کې د دوو کسانو جسدونه وموندل شول

د کډوالۍ له هیلې تر مرګه؛ په نیمروز کې د دوو کسانو جسدونه موندل شوي

د نیمروز ولایت له سیمه‌ییزو سرچینو د ترلاسه شویو معلوماتو له مخې، د دوو کسانو جسدونه چې ویل کېږي په ناقانونه توګه یې ایران ته د تلو هڅه کوله، د دغه ولایت د غلغلې په دښته کې موندل شوي دي.

سرچینو د شنبې په ورځ، د چنګاښ ۲۷مه، رسنیو ته ویلي چې د دغو دوو کسانو جسدونه پرون موندل شوي او هغوی د هغې ډلې غړي وو چې غوښتل یې په ناقانونه توګه ایران ته واوړي، خو د ریګونو په دښته کې ورک شوي وو.

د سرچینو په وینا، د کډوالو لېږدوونکي موټر د لارې په اوږدو کې له تخنیکي ستونزې سره مخ شوی او چلوونکي ټول سپاره کسان د دښتې په منځ کې پرې ایښي دي. له دې وروسته کډوال په کویر کې لاره ورکه کړې ده.

د سرچینو د معلوماتو له مخې، په دغو نږدې یوه اوونۍ راهیسې ورکو شویو کډوالو کې ماشومان هم شامل وو، خو تر اوسه د هغوی د برخلیک په اړه کره معلومات نه دي ترلاسه شوي.

سرچینو زیاته کړې چې له څو ورځو وروسته د دې ډلې د دوو نارینه وو جسدونه وموندل شول، چې د اوبو او خوړو د نشتوالي او د دښتې د سختې ګرمۍ له امله یې ژوند له لاسه ورکړی و.

طالبانو تر اوسه په دې اړه څه نه دي ویلي، خو له افغانستانه د دوی له بیا واکمنېدو وروسته، ګڼو افغانانو د بېکارۍ او بېوزلۍ له امله د کډوالۍ لاره خپله کړې ده.

راپورونه ښيي چې یو شمېر کډوال خپل منزل ته رسېږي، خو یو شمېر نور د قاچاقي سفرونو پر مهال خپل ژوند له لاسه ورکوي یا هم ورک کېږي.