په نړۍ کې اویا او په سیمه کې پینځه پنځوس میلیونه وګړي دي

په نړۍ کې اویا او په سیمه کې پینځه پنځوس میلیونه وګړي دي.
–
ترلسو میلیونو یې خپل هویت او ژبه او تر شلو میلیونو پورې وګړو یې خپله ژبه بایللې.
–
تر ټولو لوی او یوازینی قوم دی، چې نړیوالو او سیمه ییزو استخباراتو یې پر سیمه پردۍ ترهګرې ډلې ورتپلې دي.
ـ
په ټوله نړۍ کې یې تر هر بل چا، له دغو پردیو ترهګرو ډلو څخه، د سر ومال زیات زیان لیدلی دی.
ـ
نږدې شل میلیونه یې زده کړو ته لاسرسی نه لري.
ـ
سیمه یې په نړۍ کې شپږمه سیمه ده ، چې پریمانه خوږې روانې اوبه لري او د نړۍ لسمې برخې ته برېښنا او له اوبو سره تړلي تولیدات ورکولای شي، خو دوی پخپله تر نیمايي ډېر بې برېښنا، تږي او بې اوبو دي.
ـ
یوازې شل په سلو کې یې، نیم و نیمکله، پر خپله مورنۍ ژبه د زده کړې امکانات لري.
ـ
په دوی پورې تړلې جغرافیه د نړۍ ترټولو بډایه زېرمې لري، چې لسګونه ټریلیونه ډالره ارزښت لري، خو د نړۍ تر ټولو ډېر مخدره توکي د همدوی په سیمه کې کرل کیږي او د نړۍ له هغو ولسونو څخه دی، چې نږدې نیمايي يې د بېوزلۍ تر کرښې لاندې ژوند کوي.
ـ
له خپل هېواده بهر، په کار روزګار پسې د نړۍ له لومړنیو لسو سرګردانه ولسونوڅخه دی.
ـ
د شلمې او یویشتمې پېړیو تر ټولو اوږده، خونړۍ او پېچلې جګړه د همدوی پرسیمه تپل شوې ده.
ـ
د سړې جګړې پرمهال تر ټولو ډېر تلفات همدوی ورکړل.
ـ
سیمه یې د نړۍ په لومړۍ درجه جذابوجغرافیوکې راځي، چې د ګرځندوی لپاره په زړه پورې ځایونه لري، خو د نړۍ تر ټولو لږ عاید له ګرځندوی صنعت څخه همدوی لري.
ـ
د نړۍ شپږم ځوان نفوس ( ۶۰٪ – ۶۵۵٪ ) لري، خو د ګواښمنې کډوالۍ لپاره په نړیوال کچ دوهم یا درېیم زیان منونکی ولس دی.
ـ
په ټوله نړۍ کې لومړنی قوم دی، چې د پردیو له خوا پرې د ورتپل شوې ترهګرۍ په جرم توهین او تحقیر شوی، سپکاوی ورته شوی، وژل شوی، زنداني شوی او رټل شوی دی.
ـ
یو مهال په ټوله نړۍ کې دوه سترې ټولواکمنۍ ( اېمپراتورۍ) وې، یوه یې د ناپېلیون په مشرۍ په اروپا کې او بله یې د همدوی هغه په اسیا کې وه.
ـ
ژبه یې په نړۍ کې تر ټولو هنري او لنډ شعري فورم لري، چې ( لنډۍ، ټپه، مېسره، ټیکۍ …) نومیږي او یوازې د جاپانۍ ژبې هایکو یې سیالي کولای شي او بس.