د کانټيننټل فاجعه د هېرولو نه ده

ملي امنيت ادعا کوي چې ځينې کسان يې نيولي دي، خو تر دغه بريد وروسته بيا نه ملي امنيت څوک رسنيو ته وښوو چې د دغه بريد په تړاو يې نيولی، نه يې له هغې ادعا پرته بل څه وويل چې په لومړي سر کې يې ويلي وو چې بريد حقاني شبکې تر ډېورنډ کرښه پورې غاړه پلان کړی و.
ملي امنيت ايله دومره وکړل چې د يوه ځانمرګي پلار يې وموند، کامره يې ورته ونيوه او څو خبرې يې ځنې ثبت کړې، خو له دغسې بريد سره بايد داسې سر سري چلند و نه‌شي.

پرون سرخط د دغه بريد په اړه يو بل تحليل خپور کړ، په دغه تحليل يې کې د دغې پېښې د انځور ماتې ټوټې سره يو ځای کړې وې او داسې ځنې ښکارېده چې د بريد يو هدف د کانټيننټل مېشت ډاکټر وحيد پويان و.
د سرخط له شننې له ورايه ښکاري چې قوي احتمال دی چې پويان ژوندی دی، ځکه ويل شوي دي چې د پويان تابوت تش خاورو ته سپارل شوی دی.
سرخط ته، پويان ته ځينو نږدې کسانو ويلي چې د پويان په تابوت کې يوازې يو د سر هډوکی پروت و چې د هغه ډي‌اين‌اې هم د پويان له ډي‌اين‌اې سره هيڅ سر نه خوړ.

نو چې پويان دومره مهم و، پاکستان ته دومره مطلوب و، ډي‌اين‌اې يې مېچ نه دی کړی، تابوت يې تش خاورو ته سپارل شوی او د پېښې يوازېنی شاهد چې د پويان له کوټې ژوندی وتلی او په کوټه کې پاتې نور ټول کسان شهيدان شوي، هغه کس ګډې وډې وايي؛ نو ولې بيا په دې اړه لږه هڅه نه کېږي؟
ولې داسې کس چې خپل ژوند يې د دې هېواد د ګټو له‌پاره دومره په خطر کې کړی و، داسې په اسانه هېر کړل شي.

ولې دغه يوازېنی عيني شاهد نه نيول کېږي او کلکې پوښتنې نه ورڅخه کېږي؟
رسنۍ به دومره اوږد لاس او امکانات و نه لري، د هېواد استخبارات خو يې لري، ولې نه غواړي چې دغه موضوع وڅېړي، و يې ارزوي او نقشه يې پيدا کړي.
ملي امنيت کولای شي د پېښې د يوازېني ژوندي شاهد ټلېفوني اړيکې واوري، له پويان سره يې څه ويلي وو، تر هغه مخکې يې له چا سره اړيکې نيولې وې، د بريد پر مهال يې له چا سره اړيکې نيولې دي، و يې پوښتي چې د بريد پر مهال څنګه يوازې دی له کوټې ووت، کومې خوا ته ووت، هلته يې له کومو ګارسونانو سره وليدل، هغوی خو هم ټول ژوندي دي، ايا د شاهد او ګارسون خبرې سره ورته دي؟
ملي امنيت کولای شي د هوټل د امنيتي کامرو عکاسي وويني. دوی د هوټل د دريو پوړونو عکاسي ګوري، خو څلورم پوړ چې دغه مهم کس پکې و او باور دا دی چې د بريد يو هدف دی هم و، ناديده او بابېزه بلل کېږي، ولې؟

موږ پر دې باور يوو چې دغه بريدونه ډېر په بې‌شرمي او سپين سترګي شوي دي او که لږ هڅه او څېړنه هم وشي، د کلاوې د تار سر استخباراتو ته په لاس ورځي.
پر دې بيا تر هغه لا پوخ باور لرو، که د کلاوې سر پيدا شو، هم به تر بريد د مخکېنيو سل پېښو عاملان پيدا شي، هم د پنځوسو نورو دغسې فاجعو مخه نيول شوې وي.
دغه پېښه بايد په هيڅ صورت بابېزه و نه بلل شي او پر موضوع د خاورو اړولو پر ځای دې وپلټل شي، که‌نه سبا به خدای مه کړه بيا پر دغسې بله فاجعه يو بل ته اوښکې تويوو او يو بل به ملامت بولو.

سرخط ورځپاڼه