د کاناډا د بهرنیو چارو وزارت له خپلو وګړو وغوښتل چې افغانستان ته له سفر کولو ډډه وکړي

د کاناډا د بهرنیو چارو وزارت له خپلو وګړو وغوښتل چې افغانستان ته له سفر کولو ډډه وکړي.

د کاناډا د بهرنیو چارو وزارت له خپلو وګړو غوښتي چې «په افغانستان کې د ناپایدار امنیتي وضعیت، ترهګریزو بریدونو، دوامدارو وسله‌والو نښتو، د تښتول کېدو، خپلسرو نیونو او توقیف، د جرمونو د لوړې کچې او د طالبانو د چارواکو له‌خوا د بشري حقونو د پراخو سرغړونو» له امله افغانستان ته له هر ډول سفر څخه ډډه وکړي.
دغه وزارت په یوه اعلامیه کې ویلي چې په افغانستان کې امنیتي وضعیت لا هم ډېر ناپایدار او خطرناک دی.
د کاناډا د بهرنیو چارو وزارت خپلو وګړو ته ویلي: «که په افغانستان کې یاست، د اړتیا په صورت کې خوندي ځای ته د لېږد او د خپل شخصي امنیتي پلانونو د بیا ارزونې په اړه احتیاط وکړئ. په یاد ولرئ چې د خپل ځان او کورنۍ د امنیت مسؤولیت ستاسو پر غاړه دی.»
دغه وزارت زیاته کړې چې په افغانستان کې د کاناډا سفارت خپل فعالیتونه ځنډولي او په افغانستان کې د قونسلي مرستو او نورو ملاتړونو د وړاندې کولو لپاره د کاناډا وړتیا ډېره محدوده ده.
کاناډا تر دې مخکې هم څو ځله له خپلو وګړو غوښتي چې د امنیتي ګواښونو له امله افغانستان ته سفر ونه کړي.
کاناډا په افغانستان د طالبانو له بیا واکمنېدو وروسته په دغه هېواد کې خپل سفارت تړلی او د طالبانو حکومت په رسمیت نه پېژني.
خو دغه هېواد د افغانستان ګڼ شمېر سیاسي او فرهنګي فعالان، ښځې او خبریالان پناه ورکړې او له افغانستان څخه یې د طالبانو تر کنټرول لاندې بهر کړي دي.